‘भन्सार चुहावट गर्ने प्रवृत्तिलाई हामी क्षमा दिँदैनौँ’ : अर्थमन्त्री महत

विराटनगर । अर्थमन्त्री डा. प्रकाश शरण महतले जिम्मेवारी दुरुपयोग गर्ने अथवा अनुचित काम गर्ने छुट कसैलाई नभएको बताएका छन् । बिहीबार विराटनगर भन्सार निरीक्षणका क्रममा अर्थमन्त्री महतले यस्तो बताउदै कर्मचारीलाई इमान्दार, पारदर्शी र समर्पणका साथ जिम्मेवारी पूरा गर्न निर्देशन दिएका हुन् ।

उनले भने, ‘कुनै पनि तहमा माथि देखाएर जिम्मेवारी दुरुपयोग गर्ने अथवा अनुचित काम गर्ने छुट कसैलाई छैन । भन्सार चुहावट गर्ने प्रवृत्तिलाई हामी क्षमा दिँदैनौँ । मलाई विश्वास छ, तपाईंहरुले राम्रो गर्नु हुनेछ । राम्रो गर्न कोसिस गरिराख्नु भएको छ । नियम, कानुनमा उनीले तिर्नुपर्ने कुरा छ भने उनीहरुले तिर्नुपर्छ । हामीले गर्नुपर्ने काममा सम्झौता नगरौं । कर्मचारीको कामका आधारमा अर्थ मन्त्रालयले दृष्टिकोण बनाउँछ । कामभन्दा बाहेक अन्य कुनै कारण अथवा पृष्ठभूमिबाट तल–माथि लैजाने र ल्याउने काम अर्थ मन्त्रालयले गर्दैन । जिम्मेवारी बहन एउटै मात्र आधार हो । यहीअनुरुप काम गर्न म सम्पूर्ण कर्मचारी साथीहरुलाई अनुरोध गर्छु ।’

कर्मचारीको मूल्यांकन कामका आधारमा हुने उनको भनाई थियो । डा. महतले समग्रमा पारदर्शी काम गर्नका लागि र सेवाग्राहीलाई सहज र सौहद्रपूर्ण वातावरण निर्माण गर्न आग्रह समेत गरेका छन् ।