सन्दीपको पाँच विकेटमा कतारमाथि नेपालको जित, शनिबार सेमिफाइनल खेल्ने

काठमाडौं । एसीसी प्रिमियर कप अन्तरगत समूह चरणको आफ्नो अन्तिम खेलमा नेपालले कतारलाई ६८ रनले पराजित गरेको छ । बिहीबार त्रिवि क्रिकेट मैदान कीर्तिपुरमा कतारविरुद्ध जित हात पार्दै नेपाल समूह विजेता बनेको हो ।

जितको लागि नेपालले दिएको १५८ रनको सामान्य लक्ष्य पछ्याएको कतारले २५.१ ओभरमा अलआउट हुदै ८९ रन बनायो । कतारका लागि जाहीर ईब्राहिम र खुराम शेहजादले समान १५ रन बनाउदा ओपनर कमरान खान ८ रनमा क्याच आउट भए । यस्तै, कतारका प्रमुख ब्याटर इमाल लियानागे ६ रन बनाउदा आमिर फारुक १४ रनमा सिमित रहे । कतारका अन्य ब्याटरले भने दोहोरो अंकमा रन बनाउन सकेनन् ।

ब्याटिङमा खराब प्रदर्शन गरेको नेपालले बलिङ भने उत्कृष्ट गर्यो । नेपालको जितमा स्पिनर सन्दीप लामिछानेले सर्बाधिक पाच विकेट लिए । यस्तै, सोमपाल कामीले तीन तथा ललित राजवंशीले दुई विकेट लिए । त्यसअघि टियू मैदानमा टस हारेर पहिला ब्याटिङ गरेको नेपालले ४० दशमलव तीन ओभरमा सबै विकेट गुमाउँदै एक सय ५७ रन बनायो । नेपालका लागि सन्दीप लामिछानेले सर्वाधिक ४२ रनको योगदान दिएका । उनले ५८ बल खेल्दै छ चौका प्रहार गरेका थिए ।

यस्तै कप्तान रोहितकुमार पौडेलले २७, आसिफ शेखले १९, दीपेन्द्रसिंह ऐरीले १२ तथा सोमपाल कामी र आरिफ शेखले समान ११र११ रन बनाए ।बलिङतर्फ कतारका क्वाइस अहमदले १० ओभरमा ३६ रन खर्चेर तीन विकेट लिए । आमिर फारुकले चार विकेट लिदा मुनाविराले २ विकेट लिए भने इक्रमउल्लाह खानले एक विकेट लिए ।

नेपाल ४ खेलमा ३ मा जित र १ मा अंक बाँड्दै ७ अंकका साथ शीर्ष स्थानमा रहेर समूह ए को विजेताको रुपमा सेमिफाइनलमा पुगेको छ ।नेपालले सेमिफाइनल खेलमा समूह बी को उपविजेतासँग खेल्नेछ । ओमान ४ खेलमा ३ मा जित र १ खेलमा हारका साथ ६ अंकका साथ दोस्रो स्थानमा रहँदै समूह उपविजेताको रुपमा सेमिफाइनलमा स्थान बनायो ।