रवि लामिछाने र स्वर्णिम वाग्लेले लिए प्रतिनिधिसभा सदस्यको शपथ, उपेन्द्र यादव अनुपस्थित

काठमाडौं । उपनिर्वाचनबाट निर्वाचित प्रतिनिधि सभा सदस्य रवि लामिछाने र स्वर्णिम वाग्लेले शपथ लिएका छन् । वैशाख १० गते सम्पन्न उपनिर्वाचनमा चितवन २ बाट निर्वाचित लामिछाने र तनहुँ १ बाट निर्वाचित वाग्लेलाई सभामुख देवराज घिमिरेल पद तथा गोपनीयताको शपथ ग्रहण गराएका हुन् ।

सभामुख घिमिरेले शपथग्रहण गराउनुका साथै सांसदको लोगो वितरण गरेका छन् । बारा २ बाट निर्वाचित सांसद उपेन्द्र यादव अहिले काठमाडौं बाहिरै कार्यव्यस्ताको कारणले आज शपथमा अनुपस्थित भएका हुन् ।

चितवन २ बाट निर्वाचित रास्वपा सभापति रवि लामिछानेको नागरिकता विवादका कारण पदमुक्त भएकाले यही वैशाख १० गते उपनिर्वाचन भएको थियो । उपनिर्वाचनबाट लामिछाने पुनः सांसदमा निर्वाचित भएका हुन् । यसैगरी तनहुँ १ बाट निर्वाचित रामचन्द्र पौडेल राष्ट्रपति बनेपछि कांग्रेस त्यागेर रास्वपामा गएका अर्थविद वाग्ले निर्वाचित भएका थिए ।