नेशनल बर्न सेन्टरमा उपचारत सांसद भण्डारी आइतबार नेपाल आउने

काठमाडौं । नेशनल बर्न सेन्टरमा उपचारत नेपाली कांग्रेसका नेता तथा सांसद चन्द्र भण्डारी नेपाल फर्कने भएका छन् । खाना पकाउने ग्यास लिक भई भएको आगलागीबाट गम्भीर घाइते भएका भारतको नयाँ दिल्लीमा उपचाररत सांसद भण्डारीको स्वास्थ्यमा क्रमिक सुधार आएसँगै नेपाल आउने भएका हुन् ।

सांसद भण्डारीको स्वास्थ्यमा क्रमिक रूपमा सुधार आएसँगै आइतबार बेलुका ५ बजे त्रिभुवन अन्तर्राष्ट्रिय विमानस्थलबाट नेपाल आउने बताइएको छ । यही फागुन ३ गते राति आफ्नो निवास बुद्धनगरमा ग्यास लिक भई आगलागी हुँदा सांसद भण्डारी र उनकी आमा हरिकला भण्डारी घाइते भएका थिए ।

दुवै जनाको कीर्तिपुरस्थित कीर्तिपुर बर्न अस्पतालमा उपचार गरिएको थियो। आमा हरिकलाको भने उपचारका क्रममा फागुन ४ गते निधन भएको थियो । सांसद भण्डारीलाई नेपालमा यथोचित उपचार सम्भव नभएपछि फागुन ४ मा श्री एयरलाइन्सको विमानमार्फत भारतको मुम्बईस्थित नेशनल बर्न सेन्टरमा लगिएको थियो ।