लुटपाटको उद्देश्यले निराको हत्या, हत्यालगत्तै टेम्पो चढेर भागेका थिए आरोपी

काठमाडौं । गत वैशाख ७ गते कपनको सरस्वतीनगरमा भएको निरा पाण्डे आचार्यको हत्या सुन लुट्ने उद्देश्यले भएको प्रहरीले बताएको छ । आइतबार आयोजित पत्रकार सम्मेलनमा हत्यामा संलग्न रहेको आरोपमा झापामा पक्राउ परेका विनोद बिकलाई सार्वजनिक गर्दै निराले लगाएको सुन लुट्ने उद्देश्यले हत्या भएको देखिएको जनाएका हुन् ।

सरस्वतीनगरकी निरा आचार्यको हत्यामा झापाका विनोद विश्वकर्मा एक्लै जिम्मेवार रहेको प्रहरीले जनाएको छ । ७ वैशाखमा निराको हत्यापछि उनले निराले लगाएको सिक्री लुट्नुका साथै काउन्टरमा भएको ११\१२ हजार रुपैयाँ लुटपाट गरेको पत्रकार सम्मेलनमा जानकारी दिएका छन् । हत्यामा संलग्नको आरोपमा प्रहरीले झापाबाट विनोद बिकलाई शनिबार पक्राउ गरेको थियो ।

बिकले उक्त सिक्री बालाजुको एक सुन पसलमा ५५ हजार रुपैयाँमा बिक्री गरेको पाइएको प्रहरीले जनाएको छ । निराको परिवारसँग यसअघि बिकको सम्पर्क भएको नपाइएको पनि प्रहरीले बताएको छ ।