आचार्यको स्मारकको पुनः निर्माणका लागि शिलान्यास गरेकोविरूद्ध मेयर मनोजकुमार साहकोको पुत्ला दहन

जनकपुरधाम । संयुक्त युवा विद्यार्थी मोर्चाले जनकपुरधाम उपमहानगरपालिकाका मेयर मनोजकुमार साहको पुत्ला दहन गरेको छ । जनकपुरधामको भानु चोकमा आदिकवि भानुभक्त आचार्यको स्मारकको पुनः निर्माणका लागि शिलान्यास गरेको भन्दै मोर्चामा आबद्ध विद्यार्थी नेताहरूले नगरप्रमुख साहको तस्बिर जलाएका हुन् ।

मधेस आन्दोलनका प्रथम सहिद महतोको नाममा स्मारक बनाउनुपर्ने भन्दै उनीहरूले विरोधस्वरुप नगरप्रमुखको तस्बिर जलाएका छन् । उनीहरूले त्यहाँ सहिद रमेश महतोको सालिक निर्माण हुनुपर्ने माग गरेका छन् । लोकतान्त्रिक युवा सङ्घ धनुषाका अध्यक्ष प्रशान्त झाले आफूहरूलाई भानुभक्त आचार्यसँग कुनै द्वेष भाव नरहेको बताए ।

उनले भने, ‘भानुभक्तप्रतिको हाम्रो सम्मान पहिला पनि थियो र सदैव रहिरहने छ । तर, मधेस आन्दोलनको क्रममा सहिद रमेश महतो नामकरण गरिएको चौकमा पुनः भानुभक्त आचार्यको स्मारक राख्नु मधेस आन्दोलन तथा सहिदप्रतिको सम्मानमा प्रहार भएकोले हामीले विरोध गरेका हौँ ।’

उनले नगरप्रमुख साहले वार्तामार्फत यस समस्याको समाधान गर्ने बताए पनि वार्ताको वातावरण अझै नबनाएको आरोप लगाए ।