एसीसी प्रिमियर कप : यूएईको नवौं विकेटपछि वर्षाका कारणले पुन: रोकियो खेल

काठमाडौं । एसीसी प्रिमियर कपमा नेपाल र यूएईको फाइनल खेल वर्षाका कारण पुनस् रोकिएको छ । टस हारेर ब्याटिङको निम्तो पाएको यूएईले २७.३ ओभरमा ९ विकेट गुमाएर १०६ रन बनाउँदा पानी पर्न सुरु गरेपछि पुनस् खेल रोकिएको हो ।

टस जितेर पहिले फिल्डिङ रोजेको नेपालले यूएईलाई सुरुदेखि दवावमा राखेको थियो । यूएईका आसिफ खान बाहेक कसैले पनि नेपाली बलरहरुको मुकाबिला गर्न सकेका छैनन् । विश्वकप लिग २ को अन्तिम खेलमा नेपालविरुद्ध सनसनी सतक हानेका आसिफले आज पनि त्यही रुप देखाउने त्राश थियो । तर, ललित सिंह राजवंशीले उनको विकेट लिएसँगै नेपाली समर्थकले सन्तोषको सास फेरेका छन् ।

यसअघि यूएईले १६ ओभरमा ५ विकेट गुमाएर ६० रन बनाउँदा पनि खेल रोकिएको थियो । प्रतियोगिताको विजेता टोली आगामी सेप्टेम्बरमा हुने एसिया कपमा छनोट हुने भएकाले यो खेल दुवै टोलीका लागि महत्वपूर्ण छ ।