निर्दोष कसैलाई फसाउनु हुँदैन, अपराधीले उन्मुक्ति पाउनु हुँदैन : सूर्य थापा

काठमाडौं । नेकपा एमालेका नेता सूर्य थापाले नेपाली नागरिकलाई भुटानी शरणार्थी बनाउने धन्दावाल जो कोहीमाथि स-प्रमाण कारबाही हुनुपर्ने बताएका छन् । बिहिबार सामाजिक सञ्जाल फेसबुक मार्फत एक स्ट्याटस लेख्दै नेता थापाले भुटानी शरणार्थी बन्न तयार भएर रकम बुझाउने नेपाली नागरिकमाथि पनि कारबाही हुनुपर्ने बताएका हुन् ।

थापाले नेपाली भइकन नक्कली भुटानी शरणार्थी बन्न तयार भई रकम संकलन गर्ने र बुझाउनेहरू पीडित कदापि नभएको जिकिर गरे । गैर कानुनी काम गर्ने, गराउने र संलग्न हुने सबै अपराधीहरू रहेको भन्दै उनले यसमा निर्दोष कसैलाई फसाउनु हुँदैन र कोही पनि अपराधीले उन्मुक्ति पाउन नहुने बताएका ।

नेपाली नागरिकलाई मोटो रकम लिएर भुटानी शरणार्थीको सूचीमा समावेश गरेर अमेरिका पठाउने गिरोहमा संलग्नताको आशङ्कामा प्रहरीले गृह मन्त्रालयको प्रशासनिक र राजनीतिक नेतृत्वको सहयोगी पक्राउ गरिरहेका बेला एमाले नेता थापाले यस्तो अभिव्यक्ति दिएका हुन् ।