‘ढिलो न्याय पाउने प्रवृत्तिलाई अन्त्य गर्छु’ : कानून मन्त्री

काठमाडौं । नवनियुक्त कानून, न्याय तथा संसदीय मामिलामन्त्री धनराज गुरुङले चुस्त र दुरुस्त ढंगबाट सबैलाई कानून बराबर गर्ने विषय आफुले प्राथमिकता दिने बताएका छन् ।

बिहीबार सिंहदरबारमा पदबहाली गर्दै मन्त्री गुरुङले कानूनभन्दा माथि कोही पनि नहुने भन्दै कानूनबमोजिम सबै अघि बढ्नुपर्ने बताएका हुन् । उनले भने, न्याय ढिलो हुने गरेको भन्ने छ, त्यसको अन्त्यका लागि मैले काम गर्छु । स्वतन्त्र न्यायपालिका लोकतन्त्रको मेरुदण्ड भएको भन्दै उनले आफू स्वतन्त्र न्यायलयप्रति प्रतिबद्ध रहेको पनि बताएका छन् । ढिलो न्याय पाउने प्रवृत्तिलाई अन्त्य गर्ने प्रतिबद्धता जनाएका हुन् ।

जुनसुकै ठाउँमा हुने भ्रष्टाचारका सन्दर्भमा कसैलाई पनि छुट नहुने उनले प्रष्ट्याए । स्वतन्त्र न्यायपालिका लोकतन्त्रको मेरुदण्ड भएकाले यसलाई निष्पक्ष भूमिका खेल्ने उनको भनाई थियो । हिजो बुधबार मन्त्री नियुक्त भएका गुरुङले बिहीबार शपथ लिए लगत्तै मन्त्रालयमा गएर पदभार ग्रहण गरेका हुन् ।