लेटर ग्रेडिङ निर्देशिका २०७८ संशोधन, ३ वर्षसम्म मौका परीक्षा दिन पाइने

काठमाडौं । सरकारले कक्षा १२ को नियमित तथा ग्रेडवृद्धि परीक्षामा तोकिएको सम्बन्धित विषयमा ग्रेड प्राप्त गर्न नसकेका विद्यार्थीले ३ वर्षसम्म वार्षिक परिक्षा दिन पाउने व्यवस्था ल्याएको छ ।

बिहीबार मन्त्रिस्तरीय निर्णयबाट जुन जुन विषयमा ग्रेड प्राप्त गर्न नसकेको सोही विषयमा मात्र ३ वर्षसम्म ग्रेडवृद्धि परीक्षा दिन पाउने गरी ‘लेटर ग्रेडिङ निर्देशिका २०७८’ संशोधन गरेको हो । यसअघि दुई विषयभन्दा बढीमा ग्रेड प्राप्त गर्न नसकेका विद्यार्थीहरूले सोही कक्षामा अर्को वर्ष पनि सम्पूर्ण विषयहरूको परीक्षा दिनुपर्ने बाध्यता थियो ।

विद्यालय तहका विद्यार्थीहरूलाई राहत हुने गरी लेटर ग्रेडिङ निर्देशिका संशोधन गरिएको शिक्षामन्त्री अशोक राई बताउँछन् । उनले एकपटक तोकिएको न्यूनतम ग्रेड प्राप्त गरेपछि सोही विषयमा दोहोर्‍याएर परीक्षा दिन उपयुक्त नहुने भएकाले पनि यो निर्देशिका संशोधन गरिएको बताएका हुन् ।