नक्कली भुटानी शरणार्थी प्रकरणका आरोपी संसदमा बोल्दैछन् : सांसद गैरे

काठमाडौं । नेकपा एमालेका सांसद ठाकुर गैरेले नेपालीलाई नक्कली शरणार्थी बनाएर विदेश पठाउनेलाई राष्ट्रघात र देशद्रोहीको संज्ञा दिएका छन् । मंगलबार प्रतिनिधिसभाको बैठकमा सम्बोधन गर्ने क्रममा सांसद गैह्रेले देशद्रोहीहरु पनि संसद् बैठकमा बोलिरहेको बताउदै देशद्रोही काममा संलग्नलाई कारबाही गर्न सरकारसँग माग गरेका हुन् ।

उनले भने, ‘नेपाली नागरिकलाई भुटानी शरणार्थी बनाएर विदेशमा पठाउने र त्यसबापत करोडौँ असुल्ने, भ्रष्टाचार गर्ने काम जघन्य अपराध हो । यो भष्टाचारजन्य अपराध मात्र नभएर राष्ट्रघात पनि हो । देशद्रोही काम हो । त्यसकारण यस्तो काममा संलग्न मान्छेहरूलाई छिटोभन्दा छिटो कारबाहीको प्रक्रियामा ल्याइनुपर्छ । केही व्यक्तिहरू पक्राउ परेका छन् । केही सांसदहरू भागिरहनुभएको छ। केही सांसद जो नोटिसमा हुनुहुन्छ। जो सदनमा बोलिरहनुभएको छ ।’

उनले सो प्रकरणको विषयमा छानबिन के भइरहेको छ भन्दै सरकारसँग जवाफ मागेका छन् ।