धेरै बीमा कम्पनीहरुलाई लाइसेन्स दिने सरकारको कदम राम्रो होइन : अर्थमन्त्री महत

काठमाडौं । अर्थमन्त्री डा.प्रकाशशरण महतले नेपालमा धेरै बीमा कम्पनीहरुलाई लाइसेन्स दिने सरकारको कदम ठिक नभएको बताएका छन । सोमवार बीमा कम्पनीको ५५औं वार्षिकोत्सव कार्यक्रममा बोल्दै अर्थमन्त्री महतले धेरै बीमा कम्पनीहरुलाई लाइसेन्स दिने सरकारको कदम गलत भएको बताएका हुन् ।

अर्थमन्त्री महतले प्राधिकरणको अगुवाईमा बीमा कम्पनीहरु मर्जरमा जानु आवश्यक भएको उल्लेख गर्दे बीमा क्षेत्र प्रतिष्पर्धी, परिणाममुखी र स्वस्थ हुन जरुरी रहेको बताए । धेरै बीमा कम्पनीहरुलाई लाइसेन्स वितरण गरिएको भन्दै अब कोर्ष करेक्शन जरुरी रहेको उनको धारणा थियो । अर्थमन्त्री डा.महतले सरकारले बीमालाई उच्च प्राथमिकता दिएको र स्वास्थ्य बीमाको समानन्तर चलिरहेको उल्लेख गर्दै यसलाई कसरी एउटै छाताभित्र ल्याउने भन्ने चुनौति रहेको बताए ।

उनले सामाजिक सुरक्षाका दायित्वलाई कसरी वहन गर्ने भन्ने बारेमा सरकारले बीमाबाट नै सामाजिक सुरक्षा कसरी जोड्ने भन्ने बारेमा खोजिको विषयवस्तु रहेको पनि बताए । अर्थमन्त्री डा. महतले राजनीतिक स्तरबाट नियामककारी निकायहरुमा हस्तक्षेप गर्ने प्रवृत्तिका कारण पनि कतिपय व्यवसायिकतामा ह्रास आइरहेको उल्लेख गरे ।

अर्थ मन्त्रालय र मन्त्रालयसँग जोडिएका संरचनाहरु हस्तक्षेपकारी भुमिकाबाट चल्न नसके उल्लेख्य प्रगति हुन नसक्ने अर्थमन्त्री महतको धारणा छ । उनले सुरक्षाको जिम्मेवारीलाई पूर्ण रुपमा निर्वाह गर्न बीमा कम्पनीहरुले समस्यामुक्त भइ काम गर्न जरुरी रहेको पनि उल्लेख गरेका छन् ।