माधवलाई गोकुलको जवाफ- ओलीलाई हेडमास्टरको उपाधिले पुग्दैन, उहाँ त प्रोफेसर डाक्टर हो

काठमाडौं । नेकपा एमालेका सांसद गोकुल बाँस्कोटाले केपी ओलीलाई हेडमास्टरको उपाधिले नपुग्ने बताएका छन् । मंगलबार प्रतिनिधि सभाको बैठकमा नीति कार्यक्रममाथिको छलफलमा नेकपा माओवादी केन्द्रका सांसद माधव सापकोटाले एमाले अध्यक्ष केपी ओलीलाई हेडमास्टर भनेपछि सांसद गोकुल बाँस्कोटाले त्यसको जवाफ फर्काउँदै यस्तो बताएका हुन् ।

सांसद सापकोटाले नीति तथा कार्यक्रममाथि छलफलको क्रममा ओली हेडमास्टर शैलीमा प्रस्तुत भएको टिप्पणी गरेका थिए । उनले भने, ‘हेडमास्टर भन्नुभो, हामी आक्रोशित छैनौं । नेकपा एमाले लोकतन्त्र, राष्ट्रिय स्वाधीनता, सामाजिक न्याय सहितको परिवर्तनको, पुनर्जीवनको र राष्ट्रिय आत्मविश्वास निर्माणको विश्वविद्यालय हो, तपाईंहरूले दिएको उपाधिले पुग्दैन, उहाँ त भिसी उपकुलपति हो, प्रोफेसर डाक्टर हो । तपाईँहरूले कम्तीमा सिक्न पाउनुभयो । बधाई भन्न चाहन्छु । उहाँले भनेको कुरा ग्रहण गर्नु सुल्टो बाटो हुन्छ ।’

सत्तापक्ष आफ्नो कमजोरी लुकाउने प्रतिपक्षको तेजोबोध गर्ने र तीव्र प्रतिवाद गर्ने, उल्टो बाटोमा हिँडेको देखेर आफू छक्क परेको टिप्पणी गरे । तथ्यको खडेरी परेपछि आरोप प्रत्यारोप हुने उनको भनाइ छ ।