प्रतिपक्षी दलका नेतालाई विश्वप्रकाशको जवाफ- हामी न्यायाधीश होइनौं, फैसला सुनाउन

काठमाडौं । नेपाली कांग्रेसका महामन्त्री विश्वप्रकाश शर्माले प्रमुख प्रतिपक्षी दलका नेता केपी शर्मा ओलीले नीति तथा कार्यक्रममाथि बोल्ने क्रममा आफ्नो पार्टीका नेताहरूलाई नक्कली भुटानी शरणार्थी प्रकरणमा फसाउन खोजेको भन्ने अभिव्यक्ति दिएकोमा विरोध जनाएका छन् । प्रतिनिधिसभाको शनिबारको बैठकमा सरकारको आगामी आर्थिक वर्ष २०८०\८१ को नीति तथा कार्यक्रम माथिको छलफलमा सहभागी हने क्रममा शर्माले को दोषी र को निर्दोष भनेर नेपाल प्रहरीले छानबिन गर्ने बताए । एमाले अध्यक्ष ओलीले रोष्टममै उभिएर भुटानी शरणार्थी प्रकरणमा निर्दोषलाई फसाउन खोजियो भनेका थिए ।

उनले भने, ‘भ्रष्टाचारको फाइल सरकारले खोलेको बेला बधाई छ सरकार भन्ने समय हो । यो समय सरकारभन्दा बाहिर रहेको दलले पनि समर्थन गर्ने बेला हो । यो समय सरकारलाई दिएको समर्थन फिर्ता लिने बेला होइन । नक्कली भुटानी शरणार्थी प्रकरणमा प्रमुख प्रतिपक्षी दलका नेताले निर्दोष फसाउने प्रयास भइरहेको छ भन्ने वाक्य उल्लेख गर्नुभयो । रोष्ट्रममा उभिएर भन्नुभयो । को दोषी र को निर्दोष नेपाल प्रहरीले छानबिन गर्दैछ । हामी न्यायाधीश होइनौं, यहाँबाट फैसला सुनाउनका लागि कि अमूक कोही दोषी हुनुहुन्न निर्दोष हुनुहुन्छ र उहाँलाई फसाउन खोजिँदैछ भन्ने अभिव्यक्ति यहाँबाट राखिने कुरामा म विमती प्रकट गर्न चाहन्छु । यो समयमा यत्ति भन्ने हो निर्दोष कोही नफसुन्, दोषी कोही नछुटुन् ।’

शर्माले सरकारले भ्रष्टाचारका फाइल खोलेका बेला बधाई दिनुपर्ने बताएका छन् । तर, सरकारले भ्रष्टाचारका फाइल खोलेका बेला समर्थन फिर्ता लिन नहुने उनको भनाइ थियो । भ्रष्टाचार नियन्त्रणमा सरकारले कुनै मोलाहिजा गर्न नहुने बताएका छन् ।