लगानीकर्ताले गराए टीएमएस बन्द, सेयर कारोबार प्रभावित

काठमाडौं । सेयर लगानीकर्ताले अधिकांस ब्रोकर कार्यालयका टीएमएस बन्द गराइएका छन् । आन्दोलनरत लगानीकर्ताले आगामी आर्थिक वर्षको आर्थिक विधेयक संशोधन नभएसम्म शेयर कारोबार नगर्ने चेतावनी दिँदै सबै ब्रोकर कार्यालयमा सूचना टाँसेर टिएमस बन्द गराएका हुन् ।

उनीहरुले कुनै ब्रोकरले टिएमएस खोलेका कारण उत्पन्न परिस्थितिको जिम्मेवारी सम्बन्धित ब्रोकरले नै लिनु पर्ने चेतावनीसहितको सूचना ब्रोकर कार्यालयमा टाँसेका हुन् । आयतबार विहानैदेखि एक जुट भएका लगानीकर्ताहरुले विभिन्न समूह नै बनाएर ब्रोकर हाउस बन्द गराईरहेका छन् । उनीहरुले ठाउँ ठाउँमा खटिने टोली बनाएर ब्रोकरका टिएमएस बन्द गराउने, ब्रोकरका कार्यालयमै तालाबन्दी गर्ने लगायतका काम गरिरहेका छन् ।

सेयर कारोबार प्रभावित भएको छ । टिएमएस नखुलेका कारण अनलाइनबाट कारोबार गर्ने लगानीकर्ताले पनि शेयर किनबेच गर्न पाएका छैनन् । अहिले तिर्दै आएको ५ र ७.५ प्रतिशत पुँजिगत लाभकर नै अन्तिम कायम गर्नुपर्ने माग लगानीकर्ताले राखेका छन् ।