रवि लामिछानेको चेतावनी- प्रतिपक्षको उपस्थितिलाई सत्तापक्षले दादागिरी देखाउन नखोजोस्

काठमाडौं । राष्ट्रिय स्वतन्त्र पार्टीका सभापति रवि लामिछाने सत्तापक्षलाई दादागिरी नदेखाउन चेतावनी दिएका छन् । प्रतिनिधिसभाको बैठकमा रास्वपा सांसद शिशिर खनालले ‘प्रधानमन्त्री भैँसी चढेर आएको’ भन्ने अभिव्यक्ति दिएपछि मच्चिएको होहल्लापछि प्रधानमन्त्रीको भारत भ्रमणजस्तो संवेदनशील विषयमा छलफलको लागि ३० सेकेण्ड र १ मिनेट दिएर मजाक गर्न खोजेको हो ? भन्दै प्रश्न गरेका थिए ।

उनले भने, ‘प्रधानमन्त्रीले रोष्ट्रममा उभिएर सोही शब्द भन्दा केही नहुने, दृष्टान्तस्वरूप हाम्रो सांसदले भनेको शब्द हटाउने भए हटाऔं ठीक छ । त्यसो भए प्रधानमन्त्रीले भनेको शब्द पनि हटाऔं । हामीलाई केही आपत्ति छैन । सत्तापक्ष पेलेर जान खोज्छ भने थाहा होस् सत्तापक्षको सदन होइन । प्रतिपक्षको सदन हो । प्रतिपक्षको उपस्थितिलाई सत्तापक्षले दादागिरी देखाउन नखोजोस् ।’

आफ्नो पार्टीका सांसद शिशिर खनालले बोलेको ‘भैँसी चढेर आएको’ शब्दालवी हटाउनुपर्ने कुनै कारण नहरेको उनको भनाइ रहेको थियो । सम्बोधनका क्रममा प्रधानमन्त्री स्वयंमले ‘भैँसी चढेको’बारे बोलेको भन्दै उनले रास्वपा सांसदले बोलेको शब्दावली हटाउन नहुने बताएका हुन् ।

प्रधानमन्त्री भारतबाट ‘भैंसी चढेर आएको’ भन्ने शब्दले संसद बैठकमा हंगामा भएको थियो । ‘हामी चाहन्थ्यौं प्लेन चढेर भर्खरै आफैंले उद्घाटन गरेको पोखरा विमानस्थलमा अवतरण गर्नुहुन्छ भनेर तर यहाँ भैंसी चढेर आएका कुराहरू आए ।’ खनालले यति भन्न नपाउँदै माओवादी सांसदहरूले विरोध जनाएका थिए ।