खप्तड पुगेर प्रधानमन्त्री दाहालले भने- अन्तर्राष्ट्रिय आध्यात्मिक केन्द्र बनाउँछौँ

कञ्चनपुर । प्रथम खप्तड अन्तर्राष्ट्रिय आध्यात्मिक सम्मेलनको उद्घाटन गरेर प्रधानमन्त्री पुष्पकमल दाहाल फर्किएका छन् । मंगलबार सम्मेलनको उद्घाटन गरेर प्रधानमन्त्री दाहाल काठमाडौँ फर्किएका हुन् ।

प्रधानमन्त्री दाहालले सम्मेलन उद्घाटन गर्दै खप्तडमा अन्तर्राष्ट्रिय आध्यात्मिक केन्द्र बनाउने आश्वासन दिए । आध्यात्मिक केन्द्र निर्माणका लागि लगानी गर्न बाबा राम देव र आचार्य बालकृष्णलाई पनि इच्छुक रहेको प्रधानमन्त्रीले बताएका थिए। उनले खप्तड विकास कोष वा प्रतिष्ठान बनाउने विषयमा पनि छलफल गर्ने बताएका थिए । प्रधानमन्त्री प्रचण्डले आफू सुदूरपश्चिम प्रदेशको विकासको लागि प्रतिबद्ध रहेको बताएका थिए ।

प्रधानमन्त्रीले उद्घाटन गरेको सम्मेलनमा राम देव, आचार्य बालकृष्ण, पूर्व प्रधानमन्त्री झालनाथ खनाल, प्रदेश प्रमुख देवराज जोशी, उपप्रधानमन्त्री तथा गृहमन्त्री नारायणकाजी श्रेष्ठ, परराष्ट्र मन्त्री एसपी साउद लगायत उपस्थित थिए । यस्तै सुदूरपश्चिमका मुख्यमन्त्री कमल शाह, निवर्तमान मुख्यमन्त्री राजेन्द्रसिंह रावल पनि खप्तडमै छन् । राम देव मंगलबार बिहान पश्चिमी सीमा नाका गड्डाचौकी भएर धनगढी पुगेका थिए । त्यहाँबाट हेलिकप्टरमा खप्तड पुगेका थिए । खप्तडलाई अन्तराष्ट्रियस्तरमा चिनाउन खप्तड क्षेत्र पर्यटन विकास तथा व्यवस्थापन समितिको आयोजनामा मंगलबारबाट आध्यात्मिक सम्मेलन सुरु भएको हो ।

भू–स्वर्गकारुपमा चिनिने खप्तडलाई अन्तराष्ट्रियस्तरमा चिनाएर पर्यटन विकास गर्ने उद्देश्यले आयोजना गरिएको सम्मेलन तीन दिनसम्म चल्ने छ ।सम्मेलनमा स्वामी रामदेवले ध्यान र प्रवचन दिने कार्यक्रम पनि तय भएको छ ।