निर्वाचन आयोगको कार्यालय खारेज गर्ने निर्णयलाई सच्याउन महामन्त्री थापाको माग

काठमाडौं । नेपाली कांग्रेसका महामन्त्री तथा सांसद गगनकुमार थापाले निर्वाचन आयोगको जिल्ला कार्यालय खारेज गर्ने निर्णय सच्याउन माग गरेका छन् ।बुधबार प्रतिनिधिसभाको शून्य समयमा सांसद थापाले निर्वाचनको निष्पक्षतामा सम्झौता गर्ने कुनै पनि निर्णय मान्य नहुने भन्दै आयोगका कार्यालय हटाउने बजेटको योजना फिर्ता लिन माग गरेका हुन् ।

उनले भने, ‘के १५ करोड बचत गर्नका लागि निर्वाचनको निष्पक्षतामा सम्झौता गर्नुपर्ने अवस्थामा हामी पुगिसकेका हो त ? मलाई यस्तो लाग्दैन । सरकारले हुलमुलमा आयोगहरू, कार्यालयहरू कटौती गर्दा निर्वाचन आयोगको कार्यालय कटौती गर्नेतर्फ यथेष्ट ध्यान पुर्‍याएन भन्ने मलाई लाग्छ । त्यसैले आफूले गरेको गल्तीलाई समयमा सच्यायो भने त्यो गल्तीको दुष्प्रभाव हामीले बेहोर्नुपर्दैन । निर्वाचन आयोगको कार्यालय खारेज गर्ने निर्णयलाई तत्काल सच्याउनका निम्ती म नेपाल सरकारसँग माग गर्दछु ।’

उनले जिल्ला निर्वाचन कार्यालय खारेज गर्दा १५ करोडमात्रै बचत हुने र त्यसका लागि निर्वाचनको निष्पक्षतामा सम्झौता गर्न नहुने बताए ।सरकारले बजेटमार्फत जिल्ला निर्वाचन आयोगका कार्यालय हटाउने निर्णय ल्याएको कुरा संविधानसम्मत पनि नभएको थापाको भनाई थियो ।