साउदीमा काम गर्न जान अब एसइई पास अनिवार्य गरेको हुनुपर्ने 

काठमाडौं । नेपाली कामदारका लागि वैदेशिक रोजगारीको प्रमुख गन्तव्य साउदी अरबमा काम गर्न जाने कामदारहरूले  एसइई पास अनिवार्य गरेको हुनुपर्ने भएको छ ।  साउदीको पछिल्लो निर्णयअनुसार नेपालको परराष्ट्र मन्त्रालय र काठमाडौंस्थित साउदी दूतावासबाट प्रमाणित भएको शैक्षिक प्रमाणपत्र पेस गरेमा मात्रै नेपाली श्रमिकहरू जान पाउने व्यवस्था गरेको हो ।

प्रमाणित शैक्षिक योग्यता नभएमा सोमबारदेखि भिसा नदिने साउदी दूतावासले सूचना जारी गरेको छ  । त्यसैले अब सोसरह पढेका व्यक्तिहरु मात्रै साउदीमा रोजगारीमा जान पाउने छन् ।  साउदीको यो नीतिले कामदारमाथि शैक्षिक प्रमाणपत्र जुटाउनुपर्ने झन्झट थपिएको छ । शैक्षिक प्रमाणपत्र प्रमाणित गर्न नसक्ने कामदारले अब लेबर काम गर्न पनि साउदी जान पाउने छैनन् ।

साउदीको शैक्षिक प्रमाणपत्र प्रमाणीकरण गर्ने व्यवस्थाले श्रमिक पठाउन नसक्ने अवस्था सिर्जना हन सक्ने सम्भावना बढेको छ । यता  नेपाल वैदेशिक रोजगार व्यवसायी संघले साउदी अरबले शैक्षिक प्रमाणपत्र मागेको भन्दै भिसाका लागि आवेदन दिने काम बन्द गर्न व्यवसायीलाई आग्रह गरेको छ ।