प्रधानन्यायाधीश कार्कीविरुद्धको उजुरीबारे छलफल गर्ने संसदीय सुनुवाई समितिको बैठक बस्दै

काठमाडौं । प्रस्तावित प्रधानन्यायाधीशमा हरिकृष्ण कार्कीविरुद्ध परेका उजुरीको अध्ययन गर्न संसदीय सुनुवाई समितिको बैठक बस्ने भएको छ । सोमबार बिहान ११ बजेका सिंहदरबारमा बैठक बस्ने भएको हो । बैठकमा प्रस्तावित प्रधानन्यायाधीशको सुनुवाई सम्बन्धी कार्यतालिकामाथि छलफल तथा निर्णय हुने छ ।

कार्कीविरुद्ध समितिमा परेका उजुरी अध्ययन गर्ने र आवश्यकता अनुसार उजुरीकर्तालाई छलफलमा बोलाइने समिति सदस्य तथा नेकपा एमालेका सचेतक महेश बर्तौलाले बताए । हिजो मात्रै कार्कीलाई न्याय परिषद्ले अनिवार्य अवकाशको मिति सम्झाएको थियो । न्याय परिषद् सचिवालयले आइतबार एक पत्र पठाउँदै ६५ वर्षे उमेर हदका कारण आगामी साउन २० देखि अनिवार्य अवकाश पाउन लागेको जानकारी गराएको हो ।

कार्कीविरुद्ध संसदीय सुनुवाइ समितिमा २९ वटा उजुरी परेको छ । कार्कीविरुद्ध आर्थिक पाटोका साथै कानूनी पाटोको विषयमा उजुरी परेको सचिवालयले जनाएको छ ।