नयाँ लाइसेन्सको सम्पूर्ण प्रक्रिया रोक्न अर्थ समितिको निर्देशन

काठमाडौं । स्टक एक्सचेन्ज र धितोपत्र ब्रोकरहरूको नयाँ लाइसेन्सको सम्पूर्ण प्रक्रिया रोक्न संघीय संसद्को अर्थ समितिले निर्देशन दिएको छ । समितिले सोमबार अर्थ मन्त्रालयमार्फत नेपाल धितोपत्र बोर्ड र नेपाल स्टक एक्सचेन्जलाई लाइसेन्स वितरण प्रक्रियामा अनियमितता भएको निष्कर्षका आधारमा उक्त प्रक्रिया रोक्न निर्देशन दिएको हो ।

अर्थ मन्त्रालयलाई पत्र पढाई समितिबाट विस्तृत अध्ययन गरी अर्को निर्णय नभएसम्मका लागि नयाँ स्टक एक्सचेन्जको स्थापनासम्बन्धी कामकारबाहीलाई अघि नबढाउन समेत आग्रह गरेको छ । धितोपत्र दलाल तथा धितोपत्र व्यापारीको अनुमति प्रदान गरिएको सम्बन्धमा न्यूनतम मापदण्ड पूरा गरे नगरेको विषयमा समितिले छानबिन गरी निष्कर्षमा नपुगेसम्म इजाजतसम्बन्धी सम्पूर्ण प्रक्रिया तत्काल स्थगन गर्न समेत पत्रमा उल्लेख गरीएको छ ।

यसअघि प्रधानमन्त्री दाहालले निजी लगानीको स्टक एक्सचेन्जलाई लाइसेन्स वितरण गर्दा आर्थिक चलखेल हुन सक्ने र त्यसले नकारात्मक प्रभाव पार्ने निष्कर्षसहित उक्त प्रक्रिया रोक्न निर्देशन दिएका थिए  ।