समस्या समाधानका लागि नयाँ नेतृत्वको खोजीमा जलविद्युत उद्यमी

काठमाडौं । स्वतन्त्र उर्जा उत्पादकहरुको संस्था नेपाल इप्पानका अध्यक्ष पदका उम्मेद्वार गणेश कार्कीले जलविद्युत क्षेत्रका समस्या समाधानका लागि नीतिगत सुधारलाई पहिलो प्राथमिकता दिने बताएका छन् । जलविद्युत क्षेत्रमा नीतिगत रुपमा धेरै समस्या रहेको भन्दै कार्कीले आफूलाई निर्वाचित गराएमा जलविद्युत क्षेत्रका देखिएका समस्या समाधानका लागि नीतिगत सुधारलाई पहिलो प्राथमिकता राखेर काम गर्ने बताएका हुन् ।

सरकारले जलविद्युत क्षेत्रको विकास गर्नका लागि धेरै नीतिगत सुधार गर्न आवश्यक देखिएकाले सरकारसँग समन्वय गरी सुधारको पहल गर्ने उनको प्रतिवद्धता छ । ऊर्जा सम्बन्धी विद्यमान धेरै नीतिहरु जलविद्युत उत्पादन लागि बाधक रहेको भन्दै उनले त्यस्ता नीति, नियम र ऐनहरु परिवर्तन गर्नुपर्ने बताए । ४५० सदस्यहरुको सक्षम नेतृत्व आफूले गर्ने भन्दै कार्कीले अत्याधिक मत सहित आफूले जित्ने जिकिर गरे । उनले इप्पानको विधानमा कुनै समस्या नभएको बताउँदै उक्त विधान इप्पानको अघिल्लो वार्षिक साधरण सभाले बहुमतले पारित गरेकाले कुनै समस्या नभएको बताए ।

उनले अबको १० वर्षमा १० हजार मेगावाट भारतले विद्युत किन्ने भन्दै खुशी व्यक्त गरे । आगामी १० वर्षमा भारत र बंलादेश गरी १८ हजार मेगावट विद्युत बेच्ने तयारी भएपनि उत्पादन वृद्धि गर्न आवश्यक रहेको उनको भनाई छ । जलविद्युतमा लगानीमैत्री वातावरण बनाउँदै एकद्वार प्रणाली नीति बनाउनु आवश्यक रहेको कार्कीले बताए ।

सरकारले जलविद्युत सुरक्षा नीति प्रष्टसँग ल्याउन पहल गर्ने बताउँदै कार्कीले जलविद्युत विकासका लागि छोटो समयका लागि भएपनि संकटकाल लगाउन आवश्यक रहेको बताए । दश वर्षलाई सरकारले उर्जा दशक घोषणा गरी १० वर्षमा विदेशमा १८ हजार विद्युत बेच्ने र देशभित्र १० हजार मेगावट खपत गर्ने वातावरण बनाउनु आवश्यक रहेको उनको भनाई छ ।