प्रस्तावित प्रधानन्यायाधीश कार्कीसँग सांसदहरूको सवाल-जवाफ सुरु

काठमाडौं । संसदीय सुनुवाइ समितिमा प्रस्तावित प्रधानन्यायाधीश हरिकृष्ण कार्कीसँग सांसदहरूको सवाल जवाफ कार्यक्रम सुरु भएको छ । शुक्रबार बिहान संघीय संसद् सचिवालयमा संसदीय सुनुवाइ समितिमा कार्कीसँग सांसदहरूको सवालजवाफ सुरु भएको हो ।

बिहीबार नै कार्कीले भावी प्रधानन्यायाधीशका रूपमा आफ्ना कार्ययोजना प्रस्तुत गरेपछि प्रश्नोत्तर कार्यक्रम हुने भनिए पनि संसद् बैठकका कारण शुक्रबारलाई सारिएको थियो । सर्वोच्चको प्रधानन्यायाधीशमा संवैधानिक परिषद्‌बाट गत वैशाख २५ गते सिफारिस भएका कार्कीको सुनुवाइ थप एक दिन लम्बिएको हो ।

कार्कीविरुद्धको उजुरीमाथि सुनुवाइ भई हिजो उनीसँग छलफल भएको थियो । हिजोको बैठकमा कार्कीले अदालतमा बिचौलियाको प्रभाव निस्तेज गर्न प्रभावकारी कानून बनाउने योजना पेश गरेका थिए । संसदीय सुनुवाइ विशेष समितिमा आफ्नो योजना पेश गर्दै कार्कीले बिचौलियाको रूपमा पहिचान भएका व्यक्तिहरूको गतिविधि सूक्ष्म निगरानीमा राख्ने बताए । कार्कीको लिखित कार्ययोजनामा बिचौलिया नियन्त्रणका लागि छुट्टै संयन्त्र गठन गरी दोषीउपर कारबाहीका लागि सम्बन्धित निकायमा सिफारिस गर्ने उल्लेख छ ।