विमानस्थल पूर्णरूपमा सञ्चालनमा नआउँदा  व्यवसायीहरू चिन्तित

काठमाडौं । गौतम बुद्ध अन्तर्राष्ट्रिय विमानस्थल पूर्णरुपमा सञ्चालनमा आउन नसक्दा निजी क्षेत्रले लगाएको ८० अर्ब बराबरको लगानी जोखिममा परेको भन्दै निजी क्षेत्र चिन्तित देखिएको छ । नेपालको दोस्रो अन्तर्राष्ट्रिय विमानस्थल २०७९ जेठ २ गते उद्घाटन भई सञ्चालनमा आउँदा निकै खुसी र आशावादी देखिएको निजी क्षेत्र यति बेला चिन्तित छ । विमानस्थल सञ्चालनमा आएको एक वर्षसम्म पनि कुनै अन्तर्राष्ट्रिय उडान अहिलेसम्म नियमित हुन नसकेको भन्दै निजी क्षेत्र निराश बनेको हो ।

यति बेला विमानस्थललाई लक्षित गरी निजी क्षेत्रले विभिन्न क्षेत्रमा गरेको ८० अर्ब भन्दा बढी लगानी डुब्ने चिन्ता यस क्षेत्रका उद्योगी व्यवसायीहरूले व्यक्त गरेका छन् ।  नेपाल उद्योग वाणिज्य महासंघका अध्यक्ष चन्द्रप्रसाद ढकालले प्रधानमन्त्रीको भारत भ्रमणमा गौतम बुद्ध अन्तर्राष्ट्रिय विमानस्थल सञ्चालनका विषयमा भारत सरकारसँग पहल गरेकाले आशाको सङ्केत देखिएको बताए । अध्यक्ष ढकालले विमानस्थल सञ्चालनसँगै पर्यटन क्षेत्रमा उद्योगी व्यवसायीहरूले धेरै ठुलो लगानी भएकाले तत्कालको लागि जोखिम देखिएको बताउँदै सरकारले विमानस्थल पूर्णरुपमा सञ्चालनमा ल्याएर निजी क्षेत्रको अर्बौँको लगानी सुरक्षित बनाउन आवश्यक रहेको उल्लेख गरे ।

त्यस्तै, सिद्धार्थ उद्योग वाणिज्य संघका अध्यक्ष ठाकुरकुमार श्रेष्ठले विमानस्थल पूर्ण क्षमतामा सञ्चालनको माग गर्दै पटक–पटक मन्त्री, प्रधानमन्त्री, सचिव, ठुला राजनीतिक दलका नेता आउँदा निजी क्षेत्रले ज्ञापन पत्र बुझाए पनि अहिलेसम्म पहल नभएको बताए । अध्यक्ष श्रेष्ठले विमानस्थल सञ्चालनमा आएपछि पर्यटकहरूको आगमनमा वृद्धि हुने अपेक्षाले निजी क्षेत्रले लगानी गरे पनि विमानस्थल चल्न नसक्दा व्यवसायी निराश भएको उल्लेख गरे । विमानस्थल सोचेअनुसार सञ्चालनमा आउन सकेको छैन । जसले गर्दा होटेल व्यवसायका क्षेत्रमा अवौ लगानी गरेका  व्यवसायीहरू चिन्तित देखिएका छन् । विमानस्थल निर्माणसँगै भैरहवा आसपासका क्षेत्रमा तारे होटेल र साना–ठुला गरी एक सय ४६ वटा होटेल सञ्चालनमा छन् ।