पछिल्लो तीन दिनमा अत्यधिक गर्मीका कारण  भारतमा ९८ जनाको मृत्यु

काठमाडौं ।    भारतको उत्तर प्रदेश र त्यससँग जोडिएको राज्य बिहारमा अत्यधिक गर्मीका कारण ९८ जनाको मृत्यु भएको छ । स्थानीय अधिकारीका अनुसार  पछिल्लो तीन दिनमा  गर्मीका कारण उत्तर प्रदेशमा ५४ जनाको मृत्यु भएको छ भने बिहारमा ४४ जनाको मृत्यु भएको हो ।

अधिकारीहरूका अनुसार गर्मीका कारण बिरामी परी मृत्यु भएका अधिकांश व्यक्ति ६० वर्षभन्दा माथिका रहेका बताइएको छ । भारतीय मौसम विज्ञान विभाग आईएमडीको तथ्यांक अनुसार शुक्रबार र शनिबार देशका केही भागमा अधिकतम तापक्रम ४२।२ डिग्री सेल्सियस पुगेको थियो । यो सामान्यभन्दा ४।७ डिग्री सेल्सियस बढी हो  ।

उत्तर प्रदेशको सबैभन्दा बढी प्रभावित जिल्ला बलिया हो । बलियाको एक जिल्ला अस्पतालमा पछिल्लो तीन दिनमा कम्तीमा ४०० जनालाई भर्ना गरिएको छ । गर्मीका कारण ज्वरो आउने, सास फेर्न गाह्रो हुने र अन्य स्वास्थ्य समस्या देखिएको बिरामीले गुनासो गरेका छन् ।