बाढीपहिरो पीडितलाई सहज हुने गरी आवश्यक सामग्रीको व्यवस्था मिलाउन सरकारसँग माग

काठमाडौं ।  नेपाली कांग्रेसका सांसद एवं पूर्व अर्थमन्त्री ज्ञानेन्द्रबहादुर कार्कीले सुनसरीस्थित भोक्राहा नरसिंह गाउँपालिकालाई ‘विशेष आर्थिक क्षेत्र’ घोषणा गर्न सरकारसँग माग गरेका छन् । मंगलबार प्रतिनिधिसभा बैठकमा शून्य समयमा बोल्दै उनले सो क्षेत्रमा आवश्यक पूर्वाधार विकास भइसकेकाले विशेष आर्थिक क्षेत्र घोषणा गर्न सरकारले ढिलाइ गर्न नहुने तर्क समेत गरेका हुन् ।

सांसद कार्कीले पूर्वी पहाडी जिल्लाहरूमा बाढी र पहिरोमा परी धेरै धनजनको क्षति भएको उल्लेख गर्दै पीडितलाई उचित राहत, उद्धार र पुनर्वासको आवश्यक व्यवस्था मिलाउन पनि सरकारको गम्भीर ध्यानाकर्षण गराए । उनले भने, गत शनिबार सङ्खुवासभा, तेह्रथुम, ताप्लेजुङमा जुन भीषण वर्षा भयो । त्यसबाट त्यहाँ धेरै जन र धनको क्षति भएको छ । त्यो क्षतिलाई राहत, उद्धार र पुनर्स्थापना गर्दै त्यहाँको जनजीवनलाई सहज बनाउन सरकारको विशेष ध्यान जाओस् भन्ने पनि म कामना गर्दछु ।’

सांसद कार्कीले बाढी, पहिरो पीडितलाई सहज हुने गरी आवश्यक खाद्यान्न लगायतका अति आवश्यक वस्तुहरूको व्यवस्था मिलाउन पनि सरकारले ध्यान दिनुपर्ने बताए ।