आवश्यक जनशक्ति आफै व्यवस्थापन गर्न स्थानीय तहलाई मन्त्रालयको निर्देशन

काठमाडौं । सङ्घीय स्वास्थ्य तथा जनसंख्या मन्त्रालयले स्थानीय तहमा रहेका आधारभूत अस्पताललाई आवश्यक स्वास्थ्य जनशक्ति आफै व्यवस्थापन गर्न निर्देशन दिएको छ । मन्त्रालयले सबै स्थानीय तहलाई परिपत्र गर्दै अस्पताललाई आवश्यक आधारभूत जनशक्तिको व्यवस्थापन र आर्थिक स्रोत आफै जुटाउन निर्देशन दिएको हो ।

मन्त्रालयले ५, १० र १५ शैय्याका अस्पतालहरूको दरबन्दीको नमुना तयार भएको र उक्त दरबन्दी नेपाल सरकारबाट हालसम्म स्वीकृत नभएको जनाउँदै सङ्घीय सरकारमा आर्थिक भार नपर्ने गरी जनशक्ति व्यवस्थापन गर्न पत्रमा मन्त्रालयले भनेको छ । ‘नेपाल सरकारद्वारा हालसम्म संगठन संरचना तथा दरबन्दी स्वीकृत भई नसकेको हुँदा सङ्घीय सरकारमा आर्थिक भार नपर्ने गरी पालिकाको आवश्यकता र आर्थिक स्रोत हेरी कर्मचारीसँगै तलब, भत्ता र अन्य सुविधाहरूको व्यवस्थापन पालिकाबाटै होस् ।’

यस्तै मन्त्रालयले स्वास्थ्य सेवाका कर्मचारीहरू आ-आफ्नो कार्यक्षेत्रमा खटिई नियमितरूपमा बिरामीहरूको उपचारमा संलग्न हुनुपर्ने जिम्मेवारी भएकोले सरुवा, काज वा अन्य कुनै पनि बहानामा मन्त्रालय र विभागमा आउने कार्यलाई स्थानीय तहको नेतृत्वले नियन्त्रण र निगरानी गर्न पनि भनेको छ ।