रास्वपा प्रवेश पश्चात् अनिल केशरी शाह भन्छन्- प्रवेश भनेको फिनिसिङ लाइन होइन, सुरुवात मात्र हो

काठमाडौं । पूर्व बैंकर अनिल केशरी शाहले राष्ट्रिय स्वतन्त्र पार्टी र आफ्नो सोच मिलेको कारण रास्वपा प्रवेश गरेको बताएका छन् । बिहिबार रास्वपा पार्टी कार्यालयमा आयोजित पत्रकार सम्मेलनमा शाहले नेतृत्वको विकास गराउनको निम्ति आफ्नो सीप प्रयोग गर्न राजनीतिमा आएको बताएका हुन् ।

उनले भने, ‘बैङ्किङ करिअर छाडेपछि मैले नेतृत्व विकासको तालिम दिइरहेको थिएँ । राष्ट्रिय स्वतन्त्र पार्टीसँग मेरो लामो बहस भयो । बहसपछि मलाई लाग्यो, उहाँहरूको सोच र मेरो सोच ठ्याक्कै मिल्यो । सबै क्षेत्रमा नेतृत्वको विकास गराउने मेरो सीप यहाँ प्रयोग गर्न सक्छु भन्ने लागेको भएर आज यहाँ आएको छु । प्रवेश भनेको फिनिसिङ लाइन होइन, सुरुवात मात्र हो ।’

शाहले सबैलाई रास्वपा प्रवेशका लागि आह्वान पनि गरे । रास्वपाको वार्षिकोत्सवको अवसरमा बिहीबार रास्वपा प्रवेश गरेका शाहलाई प्रशिक्षण विभाग प्रमुखको जिम्मेवारी दिइएको छ । रास्वपाले वार्षिकोत्सवको अवसरमा पार्टी कार्यालय बालाजुमा चियापानको आयोजना गरेको छ । त्यसका लागि विभिन्न दलका शीर्ष नेता र कुटनीतिज्ञलाई निम्ता गरिएको छ।