दुर्घटनामा सुदूरपश्चिमका मन्त्रीको मृत्यु : छानबिन गर्न समिति गठन

काठमाडौं । सुदूरपश्चिम प्रदेश सरकारले आन्तरिक मामिला तथा कानूनमन्त्री पृथ्वीबहादुर सिंह सवार गाडी दुर्घटनाबारे छानबिन गर्न समिति गठन गरेको छ।

बिहीबार बसेको मन्त्रिपरिषद् बैठकले मन्त्री सिंहसहित तीन जनाको मृत्यु हुनेगरी बझाङको केदास्यूँ गाउँपालिकामा भएको दुर्घटनाको छानबिन गर्न मुख्यमन्त्री तथा मन्त्रिपरिषद् कार्यालयका सचिव गंगाबहादुर खरेलको नेतृत्वमा सात सदस्यीय समिति गठन गरेको हो ।

समितिमा प्रदेश प्रहरी कार्यालयका वरिष्ठ उपरीक्षक (एसएसपी), सशस्त्र प्रहरी बल नेपाल नं. ७ बैद्यनाथ बाहिनीका सशस्त्र प्रहरी वरिष्ठ उपरीक्षक, मुख्यमन्त्री तथा मन्त्रिपरिषद्को कार्यालयका उपसचिव नवराज ओझा सदस्य छन् । यस्तै मुख्य न्यायाधिवक्ताको कार्यालयका उपन्यायाधिवक्ता टेक बहादुर थापा, यातायात व्यवस्था कार्यालय धनगढीका मेकानिकल इन्जिनियर र कानुन मन्त्रालयका शाखा अधिकृत विष्णुदत्त अवस्थी सदस्य छन् ।

समितिलाई सवारी दुर्घटनाका सम्बन्धमा सत्यतथ्य पत्ता लगाएर १५ दिनभित्र प्रदेश सरकारलाई प्रतिवेदन पेश गर्न भनिएको छ ।मन्त्री सिंह सवार आन्तरिक मामिला तथा कानुन मन्त्रालयको सु।प।प्र। ००१ झ। ४८० नम्बरको गाडी झारछडामा दुर्घटना भएको थियो।

दुर्घटनामा मन्त्री सिंहसहित पत्नी अमृतादेवी र भाउजू जयादेवी सिंहको मृत्यु भएको थियो ।