ओखलढुङ्गाको चम्पादेवीमा पहिरो जाँदा एकै परिवारका चार जनाको मृत्यु

काठमाडौं । ओखलढुङ्गाको चम्पादेवी गाउँपालिका वडा नं.८ मा पहिरो जाँदा एकै परिवारका चार जनाको मृत्यु भएको छ । बिहीबार राती ११ बजे गुरुङ बस्तीमा गएको पहिरोमा ३६ वर्षीय बुवा रणबहादुर गुरुङ, २९ वर्षीया आमा शिवमाया गुरुङ र १८ महिनाको छोरी कविता गुरुङ र १० वर्षीय छोरा दिनेश गुरुङको मृत्यु भएको हो ।

मृतकमध्ये बुवा, आमा र छोरीको शव निकालिएको छ भने १० वर्षीय छोरा दिनेश गुरुङको शव निकाल्ने प्रयास भई रहेको वडा नम्बर ८ का अध्यक्ष खड्गबहादुर बरालले सेभेन स्टार फोके टेलिभिजनलाई जानकारी दिएका छन् । उनका अनुसार ४ घर पहिरोले पुर्णरुपमा बगाएको छ भने अन्य लगभग ३०/४० घरममा क्षेती पुगेको छ । २० भन्दा बढी चौपायासमेत बगाएको बताइएको छ ।

राति नै स्थानीयले प्रहरीलाई पहिरोबारे जानकारी दिएपछि नेपाल प्रहरी, सशस्त्र प्रहरी लगायतको टोली घटनास्थल पुगेर स्थानीयसहित उद्धारमा खटिएका थिए । उद्धारका लागि थप प्रहरी समेत जिल्लाबाट खटिएर घटनास्थलतर्फ गइरहेको प्रहरीले जनाएको छ । क्षतिको थप विवरण संकलन भइरहेको छ ।