भारतीय प्रधनामन्त्री मोदीद्वारा अमेरिकी संसदमा सम्बोधन

काठमाडौं  । भारतीय प्रधानमन्त्री नरेन्द्र मोदीले अमेरिकी संसदका दुवै सदनको संयुक्त बैठकलाई सम्बोधन गरेका छन् । अमेरिकाको राजकीय भ्रमणमा रहेका भारतीय प्रधानमन्त्री मोदीले बिहिबार राति सिनेट र प्रतिनिधिसभाका दुवै सदनको संयुक्त बैठकलाई सम्बोधन गरेका हुन् ।

असारको पहिलो सातादेखि अमेरिकाको राजकीय भ्रमणमा रहेका उनलाई सभामुख तथा सिनेटका अध्यक्ष एवम् अन्य अधिकारीले सम्बोधनका निम्ति आमन्त्रण गरेका थिए । सम्बोधनमा अमेरिका र भारतबीचको सम्बन्धको चर्चा गर्दै मोदीले भारत अब छिट्टै विश्वको तेस्रो ठूलो अर्थतन्त्र बन्ने घोषणा समेत गरेका छन् । अमेरिका भारतको महत्वपूर्ण रक्षा साझेदार बनेको भन्दै मोदीले आतंकवाद विरुद्धको लडाईमा कुनै सम्झौता हुदैन भनेका थिए । भारत अघि बढ्दा विश्व नै अघि बढ्ने भन्दै रुस युक्रेन युद्धले विश्वलाई नै पीडा दिएको बताए ।

अमेरिकी कङ्ग्रेसको संयुक्त बैठकलाई दुई पटक सम्बोधन गर्ने प्रधानमन्त्री मोदी एकमात्र भारतीय नेता हन् । यो विदेशी प्रतिष्ठित व्यक्तिहरूलाई अमेरिकाले दिने सर्वोच्च सम्मानमध्ये एक हो । सन् २०१४ मा प्रधानमन्त्री बनेपछि नेता मोदीले तीनै जना अमेरिकी राष्ट्रपति बाराक ओबामा, डोनाल्ड ट्रम्प र जो बाइडेनसँग द्विपक्षीय र बहुपक्षीय भेटघाटका लागि आधा दर्जनभन्दा बढीपटक अमेरिकाको भ्रमण गरेका छन् ।