सामन्तवाद र प्रतिक्रियावादले थुपारेको फोहोरको डङ्गुर सफा नगरी देश बन्दैन : प्रधानमन्त्री प्रचण्ड

पोखरा । प्रधानमन्त्री एवं नेकपा माओवादी केन्द्रका अध्यक्ष पुष्पकमल दाहाल प्रचण्डले सामन्तवाद र प्रतिक्रियावादले फोहोरको डङ्गुर थुपारेकोले त्यसलाई सफा नगरी देश नबन्ने जिकिर गरेका छन् । शनिबार बिहान पोखरामा उपलब्ध माओवादी केन्द्रका केन्द्रीय सदस्य एवं प्रदेश पदाधिकारीहरूसँग अन्तरक्रियामा प्रधानमन्त्री प्रचण्डले देश निर्माणका लागि नयाँ फड्को जरूरी रहेको भन्दै सामाजिक न्याय, सुशासन र समृद्धिका पक्षमा फड्को हान्न खोजिएको बताएका हुन् ।

उनले भने, ‘हामीले राम्रो गर्न खोज्दैछौँ । सामन्तवाद र प्रतिक्रियावादले फोहोरको डङ्गुर थुपारेको छ, त्यसलाई सफा नगरी देश बन्दैन । देश निर्माणका लागि फेरि नयाँ फड्को जरूरी छ। सामाजिक न्याय, सुशासन र समृद्धिका पक्षमा फड्को हान्न खोजिएको छ । यसमा हामी दृढतापूर्वक अघि बढ्नुपर्छ । सरकार यसमा दृढ छ ।’  प्राकृतिक साधनस्रोत उपयोग गरेर देशको समुन्नतिका पक्षमा फड्को हान्ने आफ्नो मन रहेको बताउँदै पार्टीका सबै नेता/कार्यकर्ताले देशको समृद्धिको पक्षमा काम गर्ने संकल्प गर्नुपर्न उनको भनाई थियो ।

प्रधानमन्त्री प्रचण्डले समाजवादी मोर्चा घोषणा भइसकेको उल्लेख गर्दै पूर्वमाओवादीबीच पार्टी एकता हुने उद्घोष गरे । प्रधानमन्त्री प्रचण्डले विशेष महाधिवेशन गर्ने तयारी भइरहेको बताउँदै सरकारका कामको व्यवस्थित स्वामित्व, पार्टी निर्माणको काम, समाजवादी मोर्चा र पार्टी एकताको प्रयासलाई सँगसँगै लैजानुपर्ने बताए ।