चलचित्र ‘काँडेतार’ लाई दश लाख पुरस्कार प्रदान

काठमाडौं ।  चलचित्र ‘काँडेतार’ लाई दश लाख पुरस्कार प्रदान गरिएको छ । चलचित्र विकास बोर्डले स्थापना गरेको ‘स्टोरी बैंक’ अन्तर्गत नवल खड्का अभिनीत तथा निर्देशित फिल्म ‘काँडेतार’लाई शनिबार बोर्डको २३औं वार्षिकोत्सवको अवसरमा १० लाखको चेक हस्तान्तरण गरिएको हो ।

सूचना तथा सञ्चार प्रविधि मन्त्री रेखा शर्मा र बोर्ड अध्यक्ष भुवन केसीले संयुक्त रुपमा निर्देशक खड्कालाई १० लाखको चेक हस्तान्तरण गरेका थिए । ‘स्टोरी बैंक’मा प्राप्त कथा तथा पटकथामध्ये ‘काँडेतार’को कथालाई सर्वोत्कृष्ट छनोट गरेर सहयोग प्रदान गरिएको हो ।

२०७७ सालमा बोर्डले यथार्थपरक, कलात्मक फिल्म निर्माणका लागि प्रोत्साहन गर्न ‘स्टोरी बैंक’ स्थापना गरेको थियो । बोर्डको यो योजनालाई सरकारले आफ्नो बजेटमा समेत समावेश गर्दै आएको छ । बोर्डको वार्षिकोत्सवमा कथानक तथा लघु फिल्मका लेखकहरुलाई पनि प्रोत्साहन स्वरुप नगद पुरस्कार प्रदान गरिएको छ ।