हिमाल र उत्पीडित जातिका सांसदलाई तेस्रो दर्जाको रूपमा हेरिँदो रहेछ : सांसद शेर्पा

काठमाडौं । राष्ट्रियसभा सदस्य सोनाम गेल्जेन शेर्पाले पहुँचवाला मन्त्री र सांसदहरुले आफ्नो क्षेत्रमा मात्रै बजेट पारेको आरोप लगाएका छन् । सोमबारको राष्ट्रियसभा बैठकमा राष्ट्रियसभा सदस्य शेर्पाले पहुँचवाला मन्त्री र सांसदले मात्रै आफ्नो क्षेत्रमा बजेट लाने गरेका बताएका हुन् ।

उनले हिमाल, उत्पीडित र पिछडिएका जातिबाट आएका सांसदहरुलाई तेस्रो दर्जाको रुपमा हेरिएको बताए । बजेट माग गर्न जाँदा मन्त्रालयका सचिवहरुले बजेट छैन भनेर ढाँट्ने गरे पनि बजेट ल्याउँदा भने ठुल्ठूला नेताहरुको क्षेत्रमा मात्रै हाल्ने गरेको बताए ।

उनले भने‚ ‘हामी ३ स्तरका सांसदहरु रहेछौँ । एउटा पहुँचवाला सांसद, मन्त्री हुने । ठूलै बजेट लाने । एउटा सांसद यसो थर्काएर, विरोध गरेर पनि अलिअलि पैसा लाने । हामी जस्तो हिमालबाट आएका, उत्पीडित जातिबाट आएका, पिछडिएका जातबाट आएकाहरु चाहिँ तेस्रो दर्ताको सांसद पर्दो रहेछौँ । न बजेट लान सक्छ‚ न केही गर्नसक्छ। सचिवहरुकहाँ गयो‚ सचिवहरुले पनि ढाँट्ने यसपालि त बजेट नै छैन । किनभने हाम्रा राष्ट्रिय गौरवका आयोजनाहरु बनाउनुपर्छ‚ नियमित कार्यक्रमहरु छन् ।’

उनले बजेट बाँडफाँट हेर्दा देशमा संघीयताको आवश्यकता महशुस भएको बताए । उनले संघीयताको कारण मात्र प्रदेश र स्थानीय तहमार्फत केही बजेट जान पाएको भन्दै अन्यथा हिमाली क्षेत्रले केही पनि नपाउने बताए । उनले समाजबाट नैतिकता हराउँदै गएको भन्दै युवाहरुलाई नैतिक शिक्षा पढाउनु जरुरी रहेको बताए ।