कोशी प्रदेशको मुख्यमन्त्रीमा कांग्रेसका उद्धव थापालाई उम्मेदवार बनाउने गठबन्धनको निर्णय

काठमाडौं । सत्ता गठबन्धनले कांग्रेसका प्रदेश संसदीय दलको नेता उद्धव थापालाई कोशी प्रदेशको मुख्यमन्त्री बनाउने निर्र्णय गरेको छ । आज सोमबार बालुवाटारमा बसेको गठबन्धनको बैठकले कांग्रेस कोशी प्रदेश संसदीय दलको नेता थापालाई मुख्यमन्त्रीको उम्मेदवार बनाएर नयाँ सरकार गठनको प्रस्ताव लैजाने निर्णय गरेको हो ।

कोशी प्रदेशमा गत पुस २४ गते मुख्यमन्त्री बनेका मुख्यमन्त्री हिक्मत कार्की नेतृत्वको सरकारले शुक्रबार विश्वासको मत पाउन नसकेपछि कांग्रेस, माओवादी, एकीकृत समाजवादी र जसपासहतिको गठबन्धनले नयाँ सरकार गठनको लागि आह्वान गरेको छ । आइतबार मात्रै प्रदेश प्रमुख पर्शुराम खापुङले असार २१ गते अपराह्न ५ बजेसम्म समय दिएर नयाँ सरकार गठनका लागि आह्वान गरेका छन् ।

कोशी प्रदेशमा ९३ सदस्य रहेका छन् । बहुमत पुर्याउन ४७ सीट चाहिन्छ । राप्रपाले एमालेसँगको गठबन्धन नछोडेको अवस्थामा विपक्षी गठबन्धनको बहुमत पुग्न सक्ने अवस्था छैन । एमालेको ४० र राप्रपाको ६ गरी ४६ सांसद छन् । नेपाली कांग्रेसको २९, माओवादीको सभामुखबाहेक १२ सीट, नेकपा एसको ४ र जसपाको १ गरी गठबन्धनसँग पनि ४६ नै सीट छ ।