राजाको छोराले बिहे गर्दा पालिकाले दियो सार्वजनिक बिदा

काठमाडौं । हिमाल पारीको जिल्ला मुस्ताङको लोमन्थाङ गाउँपालिकामा आज सार्वजनिक बिदा दिइएको छ । मुस्ताङका ‘राजा’ झिग्मी सिङ्गी पलवर बिष्टका छोरा झिग्मी धिण्डुप फुन्छोक पलवर बिष्टले आज बिवाह गर्ने लागेको भन्दै पालिकाले बिदा दिएको हो । राज परिवार र उनीहरुको सांस्कृतिक बारे बुझ्नलाई लागि बिदा दिइएको जनाइएको छ ।

आज म्ुस्ताङको लोमन्थाङ गाउँपालिकामा सार्वजनिक बिदा छ । कुनै राष्ट्रिय तथा स्थानीय चाड तथा कुनै शोक मनाउन पालिकाले बिदा दिइएको होइन । बिदा त मुस्ताङी राजाको छोराको बिहेकाका लागि भन्दै दिइएको हो । आइतबार अध्यक्ष टसि न्हर्वु गुरुङद्वारा सूचना जारी गर्दै सोमबार बिदा दिने उल्लेख गरेका थिए । त्यहाँका राजको परम्परा र संस्कृतिबारे जानकारी दिन बिहेमा सार्वजनिक बिदा दिइएको बताएको छ । पालिकाका प्रमुख प्रशासकीय अधिकृत बुद्धिराम उपाध्यायले संस्कृतिबारे जानकारी दिन बिदा दिइएको बताएका छन् ।

बिदाको दिन पालिकाअन्तर्गत सबै कार्यालय र शिक्षण संस्था बन्द रहनेछन् । मुस्ताङका ‘राजा’ झिग्मी सिङ्गी पलवर बिष्टका छोरा झिग्मी धिण्डुप फुन्छोक पलवर बिष्टको आज बिहे हुँदैछ । लोमान्थाङमा अझै पनि पलवर बिष्टलाई राजाको उपाधि दिई विभिन्न धार्मिक तथा सांस्कृतिक उत्सवहरुमा सम्मान दिने गरिएको पालिकाका प्रमुख प्रशासकीय अधिकृत उपाध्यायको भनाई छ । विद्यालयका बालबालिकामा पनि सो संस्कृतिबारे जानकारी होस् भन्ने उद्देश्यले बिदा दिइएको बताइएको छ ।

कस्ता अवसरमा बिदा दिने भन्ने अधिकार स्थानीय तहको संस्कृतिसँग पनि जोडिने हुँदा पालिकाले बिदा दिन पाउने ब्यवस्था छ । २०६२÷०६३ सालको दोस्रो जनआन्दोलनअघिसम्म उपल्लो मुस्ताङमा राजा जिग्मे पलवर विष्ट लोकप्रिय थिए । देश गणतन्त्रमा गएसँगै देशमा राजतन्त्र छैन । ज्ञानेन्द्र शाहले गद्दी त्याग गरेसँगै नेपालमा राजाको अस्तित्व पनि सकिएको हो तर, मुस्ताङमा रैथाने राजाको स्थान अझै सुरक्षित छ । नेपाल सरकारको प्रतिनिधिको रुपमा गाउँपालिकाहरु भएपनि जनप्रतिनिधिले पनि राजालाई मान्ने गर्छन् ।

उनीहरु कुनैपनि सांस्कृतिक कार्यक्रम राजा बिना मनाउने गर्दैनन् । स्थानियवासीले उनलाई आस्था र विश्वासको केन्द्रको रुपमा मान्ने गरेका छन् । उनी सांस्कृतिक राजा हुन् । त्यहाँ राजाले प्रशासनिक हस्तक्षेप भने गर्दैनन् । आसपासका क्षेत्रमा हुने कुनैपनि कार्यक्रममा उनलाई सम्मानपूर्वक र हार्दिकताका साथ स्वागत गर्ने गरिन्छ ।