पाश्र्व गायनमा डेव्यु गर्दै एलिना चौहान 

काठमाडौं । रेखा फिल्मस्बाट बन्ने नयाँ फिल्मको गीत सोमबार रेकर्डिङ गरिएको छ । बाबुल गिरीको संगीत र शंकर अधिकारी घायलको शब्द रहेको गीतमा गायिका एलिना चौहानले स्वर दिएकी छन् । गीतमा बबुल र एलिना दुवैको स्वर रहनेछ । एलिना चौहानले पहिलो पटक फिल्मको गीतमा स्वर दिएकी हुन ।

एलिना यसै गीतबाट पाश्र्व गायनमा डेव्यु गर्दै छिन् । कभर गीत गाएर चर्चामा आएकी एलिनाले गाएका दर्जन गीतहरू सुपर हिट छन् । उनले गाएको पछिल्लो गीत ‘धोकेवाज’ गीत भाइरल नै बन्यो । बबुल गिरी पनि पछिल्लो समयका चर्चित गायक तथा संगीतकार हुन् । उनको स्वर र संगीतमा रहेको ‘छक्का पञ्जा ४’ को ‘सिरुपाते जुँगा’ छोटो समयमै सुपर हिट गीत बन्यो ।

नाम तय हुन बाँकी रेखाको फिल्ममा चार वटा गीतहरू रहनेछन् । बाँकी तीन वटा गीतहरूमा संगीतकार अर्जुन पोखरेलले संगीत सृजना गर्दै छन् । रेखा र पूजा पक्का भएको फिल्मको साउनको दोस्रो साताबाट छायाँकन सुरु गर्ने तयारी छ ।