चर्चित गायक तथा अभिनेता रविन तामाङको निधन

काठमाडौं । नेपाली चर्चित रक गायक तथा अभिनेता रोविन तामाङको निधन भएको छ । मंगलबार साँझ काठमाडौंको बूढानीलकण्ठ नगरपालिका–५ चिस्यानीस्थित निवासमा ६० वर्षीय ‘रोविन एन्ड न्यु रिभोलुसन’का लिड गायक तामाङ मृत फेला परेका हुन् । रोविनकै आधिकारिक फेसबुक पेजमा उनको मृत्यु भएको खबर पोस्ट भएको थियो । उनको शव त्रिवि शिक्षण अस्पताल महाराजगञ्जमा राखिएको छ । बुधबार बिहान १० बजे उनको शव पोष्टमार्टम हुनेछ ।

ब्रिटिश सेनामा सक्रिय परिवारको कान्छो सन्तानका रूपमा उनको जन्म सिंगापुरमा भएको थियो । सिंगापुरमै अध्ययन गरेका उनी बाल्यकालदेखि नै अमेरिकी गायक तथा संगीतकार जिमी हेन्ड्रिक्स र लन्डनको अंग्रेजी रक ब्याण्ड डीप पर्पलबाट प्रेरित थिए। सन् १९८० मा टोरन्टोको हम्बर कलेजमा पढ्दाताका नै उनले एक ब्याण्डमार्फत् विभिन्न ठाउँमा प्रस्तुति दिएका थिए ।

नेपाली रक ब्याण्ड ‘रविन एन्ड लुज रविन एन्ड दि न्यू रेभोलुसन०’का संस्थापक रविन पछिल्लो समय फिल्म अभिनयमा व्यस्त थिए । ‘जय पशुराम’, ‘बादशाह जुट’, ‘चिसो एष्ट्रे’, मुखौटा’, ‘छड्के’, ‘नाका’, ‘वान वे’ लगायत दर्जन बढी फिल्ममा अभिनय गरेका उनको पछिल्लो फिल्म ‘छड्के २’ केही अगाडि प्रदर्शनमा आएको थियो । हिन्दी वेब सिरिज ‘दि लास्ट आवर’मा समेत अभिनय गरेका उनको नेपाली रक गीतको विकासमा योगदान महत्त्वपूर्ण मानिन्छ ।