३ महिनामा ब्रोइलर कुखुराको मासु किलोमै ६० रुपैयाँले बढ्यो

काठमाडौं । बजारमा ब्रोइलर कुखुराको तयारी मासुको मूल्य प्रतिकिलो ४३० रुपैयाँदेखि ४६० रुपैयाँसम्म पुगेको छ । पछिल्लो ३ महिनामा तयारी मासुको मूल्य किलोमा ६० रुपैयाँले बढेर प्रतिकिलो ४३० रुपैयाँदेखि ४६० रुपैयाँमा कारोबार भएको हो ।

जबकि ४ वैशाखमा प्रतिकिलो कोल्ड स्टोर मूल्य २८० रुपैयाँ हुँदा तयारी मासुको मूल्य ३८० देखि ४०० रुपैयाँ प्रतिकिलो हाराहारी थियो । राष्ट्रिय कुखुरा बिक्री व्यवसायी संघले गत साता मात्रै ब्रोइलर कुखुराको कोल्ड स्टोर मूल्य किलोमा १० रुपैयाँले बढाउने निर्णय गरेको थियो । जस अनुसार बजारमा ब्रोइलर कुखुराको कोल्ड स्टोर मूल्य प्रतिकिलो ३१० रुपैयाँ पुगेको थियो ।

वैशाखयता मात्रै कुखुराको कोल्ड स्टोर मूल्य ६ पटक बढेको छ । काठमाडौंमा दैनिक करिब ५ लाख तयारी मासुका माग रहेको र त्यसै अनुसार मासुको उत्पादन हुन नसकेको संघको दाबी छ ।