मेलम्चीको पानी सातामा एकपटक मात्रै वितरण हुने

काठमाडौं ।  मेलम्ची खानेपानीको वितरण बन्द भएको छ । आयोजनाको बाँधमा धमिलो पानी र बाढी आउन थालेपछि करिब साढे दुई महिनाका लागि खानेपानी बन्द भएको हो ।

दुई वर्षअघि नै आयोजनाको बाँधमा बाढीले पुगेको क्षति मर्मत नभएको र विकल्पमा खोलिएको डाइभर्सन टनेलसमेत थुनिने डरले बर्खा लागेसँगै खानेपानी बन्द गरिएको छ । पानी पठाउन बन्द भएपछि उपत्यकाभित्र वितरण हुने खानेपानीको तालिका पनि परिवर्तन हुने भएको छ । काठमाडौं उपत्यका खानेपानी लिमिटेड केयुकेएलले मेलम्चीको पानी आइरहेको अवस्थामा धेरैजसो ठाउँमा सातामा दुईपटक वितरण हुँदै आएकोमा अब भने एकपटक मात्रै वितरण गर्ने तयारी छ ।

पानी भण्डारण कम हुने भएकाले एक साताको फरकमा पानी वितरण गर्ने तालिका केयुकेएलले तयार पारिसकेको छ । उपत्यकामा मेलम्चीबाहेक आसपासका मूल मुहान र खोलाहरूबाट दैनिक करिब १२ करोड लिटर पानी आउने केयुकेएलले जनाएको छ ।