‘नवीन राप्रपा २०८०’ सफल पार्न सातै प्रदेशमा संयोजक

काठमाडौं । राष्ट्रिय प्रजातन्त्र पार्टीले सातवटै प्रदेशमा पार्टी संयोजक तोकेको छ । पार्टी अध्यक्ष राजेन्द्र लिङ्देनले मंगलबार ‘नवीन राप्रपा २०८०’ कार्ययोजना कार्यान्वयनका लागि प्रदेश प्रमुखलाई प्रदेश संयोजक तोकेका हुन् ।

प्रवक्ता मोहनकुमार श्रेष्ठका अनुसार पार्टीको केन्द्रीय कार्यसमिति र केन्द्रीय कार्यसम्पादन समिति बैठकबाट पारित गरिएको ‘नवीन राप्रपा–२०८०’ कार्ययोजना कार्यान्वयन गर्न अध्यक्षले सातवटै प्रदेशमा प्रदेश संयोजक तोकेका हुन् । लिङ्देनले वरिष्ठ उपाध्यक्ष रोशन कार्कीलाई कोशी, वरिष्ठ नेता बुद्धिमान तामाङलाई मधेश, उपाध्यक्ष बिक्रम पाण्डेलाई वाग्मती, वरिष्ठ उपाध्यक्ष ध्रुबबहादुर प्रधानलाई गण्डकी, वरिष्ठ उपाध्यक्ष रवीन्द्र मिश्रलाई लुम्बिनी साथै उपाध्यक्षहरु मुकुन्दश्याम गिरीलाई कर्णाली र उद्धव पौडेललाई‌ सुदूरपश्चिम प्रदेशको संयोजक तोकेको प्रवक्ता श्रेष्ठले जनाएका छन् ।

राष्ट्रियता, प्रजातन्त्र, स्थायित्व र समृद्धिका लागि मुलुकमा सर्वधर्म समभाव, पूर्ण धार्मिक स्वतन्त्रतासहितको वैदिक सनातन धर्म, सापेक्ष हिन्दु राष्ट्र, अभिभावकीय राजसंस्था, प्रदेशरहित केन्द्र र बलियो स्थानीय तह भएको शासन प्रणाली, बृहत् राष्ट्रिय एकता, आर्थिक उदारीकरण र कल्याणकारी राज्यलाई नयाँ पुस्ताको नेतृत्वमा लैजान भन्दै राप्रपाले नवीन राप्रपाको अवधारणा अघि सारेको छ ।