कोशीमा प्रदेश प्रमुखले दिएको नयाँ सरकार गठनको दाबी पेस गर्ने समय आज सकिँदै

काठमाडौं । प्रदेश प्रमुख परशुराम खापुङले कोशी प्रदेशमा सरकार गठनको दाबी पेस गर्न दिएको समयसीमा बिहीबार सकिँदैछ । विश्वासको मत नपाएर एमालेका हिक्मतकुमार कार्की नेतृत्वको सरकार ढलेपछि प्रदेश प्रमुख परशुराम खापुङले सरकार गठनका लागि दाबी पेस गर्न दिएको समयसीमा बिहीबार साँझ ५ बजे सकिने भएको हो ।

प्रदेश प्रमुखले संविधानको धारा १६८(२) अन्तर्गत मुख्यमन्त्री नियुक्तिका लागि दिएको सीमा तोकेका थिए । कांग्रेसको नेतृत्वमा रहेको गठबन्धनले सभामुखलाई समेत जोडेर नयाँ सरकार गठनका लागि दाबी पेस गर्ने तयारी गरेको छ । सभामुखसहित ४७ प्रदेश सांसदको समर्थनमा सरकारमा दाबी पेस गर्ने तयारी गठबन्धनले गरेको छ । तर, एमाले र राप्रपाले भने सरकार गठनको दाबी पेस गर्दा सभाभुखले हस्ताक्षर गर्न नपाउने बताइरहेका छन् ।

गठबन्धनका दलहरूले नेपाली कांग्रेसका संसदीय दलका नेता उद्धव थापालाई मुख्यमन्त्री बनाउने निर्णय गरेका छन् । तर अहिलेसम्म थापाको नेतृत्वमा बहुमत पुगेको छैन । ९३ सदस्यीय प्रदेशसभामा अहिले कांग्रेसको नेतृत्वमा ४६ तथा एमालेको नेतृत्वमा ४६ सांसद देखिएका छन् ।