सामाजिक कथामा बन्ने फिल्म ‘हात्तीछाप’को छायांकन सुरु

काठमाडौं । फिल्म ‘हात्तीछाप’को आजबाट छायांकन सुरु भएको छ । आइतबार बालकुमारीस्थित एक ग्यारेजमा क्यामेरा, स्क्रिप्ट र क्ल्याप पूजा गर्दै फिल्मको छायांकन थालिएको हो । फिल्मको छायांकन १५ दिन काठमाडौं र १५ दिन पोखरा आसपासमा हुनेछ । सामाजिक कथावस्तुलाई कमेडी शैलीमा प्रस्तुत गरेर बन्न लागेको यस फिल्ममा कथा, पटकथा तथा संवाद प्रदीप भारद्वाजको रहनेछ ।

फिल्ममा किरण नेपालीको निर्माण तथा सिमोस सुनुवारको निर्देशन रहनेछ । साउनभित्र छायांकन पूरा गरेर फिल्मलाई आगामी तिहार छेकोमा प्रदर्शन गर्ने तयारीमा निर्माण टिम छ । फिल्मको निर्माण कम्पनी रेड बर्ड प्रोडक्सन हो । यसअघि किरण नेपालीको निर्माणमै बनेको फिल्म ‘२ नम्बरी’मा दयाहाङ राई, सौगात मल्ल र उपासना सिंह ठकुरीले काम गरेका थिए । यो फिल्म सुपरहिट भएपछि किरणले ‘हात्तीछाप’को निर्माण सुरु गरेका हुन् ।

छायांकन सुरु भएसँगै फिल्ममा अभिनेत्री बेनिशा हमालको प्रवेश भएको छ । सिमोससँग उनको यसअघि ‘झ्यानाकुटी’मा सहकार्य भएको थियो । ‘हात्तीछाप’मा बेनिशासँगै दयाहाङ राई, सौगात मल्ल, विल्सन विक्रम राई, गौरव पहारी, उपासना सिंह ठकुरी, बुद्धि तामाङ, विजय बराल, कमलमणी नेपाल, राजन खतिवडा, पुस्कर गुरुङ, प्रकाश घिमिरे, रविन्द्र झा लगायतका कलाकारहरुको अभिनय रहनेछ ।