बहुभाषिक माध्यमको सिकाइसम्बन्धी नीति अवलम्बन गर्न युनिसेफ नेपालको सुझाव

काठमाडौं । युनिसेफ नेपालले गरेको अध्ययनले बहुभाषिक माध्यमको सिकाइसम्बन्धी नीति ल्याउनुपर्ने निष्कर्ष निकालेको छ । शिक्षा तथा मानव स्रोत विकास केन्द्र, भाषा आयोग, युनेस्को र ब्रिटिश काउन्सिलको सहकार्यमा पालमा बालबालिकाको सिकाइ उपलब्धिमा भाषा र भाषा नीतिको प्रभावप्रतिको बुझाइ’ शीर्षकमा गरेको अध्ययनले बालबालिकाको सिकाइमा गुणस्तर तथा प्रभावकारिता बढाउन यस्तो नीति ल्याउनुपर्ने निष्कर्ष निकालेको हो ।

युनिसेफ नेपालले गरेको अध्ययनमा हालसम्म बहुभाषिक माध्यमको सिकाइबारे कुनै एकरुप नीति नभएकाले कक्षाकोठा, कार्यस्थल र समाजमासमेत यसबारे स्पष्ट बुझाइ हुनुपर्ने सुझाव दिइएको हो । संविधानतः सबै मातृभाषा राष्ट्रभाषा भनिए पनि व्यवहारतः सबै भाषाको समान मान्यता नरहेको अवस्थामा अध्ययन प्रतिवेदनले सबै भाषाको सबलीकरणका लागि सरकारको प्रतिबद्धता समान रुपमा व्यक्त हुन सकेमा न्याय र समानता मिल्ने उल्लेख गरेको छ ।

अध्ययनले बहुभाषाका माध्यममा पढाइनुलाई समस्या वा चुनौती नठान्न भनिएको छ । बालबालिकालाई उनीहरुको बोलिचालिको भाषामा पढाएमा कक्षा कोठामा सहजता हुनाका साथै धेरै अन्तक्रिया भई सिकाइमा अभ्यस्त हुने र सिकाइको आधारस्तम्भ बलियो हुने अध्ययनको सार रहेको छ ।