अन्नपूर्ण पदमार्ग पुनः सुनसान बन्दा पर्यटन व्यवसायी चिन्तित   

लमजुङ ।  विश्व पर्यटन बजारका महत्पूर्णमध्ये एक मानिने अन्नपूर्ण पदमार्गमा यति बेला पर्यटक घट्दा पर्यटन व्यवसायी चिन्तित छन् । दुई पटकको कोरोनाले थलिएर बिस्तारै माथि उठ्दै गरेको यस क्षेत्रमा   बर्खा सुरु भएयता ह्वात्तै पर्यटक घटेर  पदमार्ग सुनसान बन्दा पर्यटन व्यवसायी निराश बन्न थालेका हुन् ।

कोरोना सङ्क्रमण र चिसो मौसमपश्चात् फस्टाउन थालेको पर्यटन क्षेत्र पुनः बर्खाले थला पारेसँगै हप्ता–दश दिनअघिबाट पदमार्गमा आउने पर्यटक शून्यजस्तै भएका जनाइएको छ । पर्यटक नआउँदा आम्दानीको स्रोत ठप्प भएको व्यवसायीको भनाई छ ।  कोरोनाको लहर घटेसँगै बिस्तारै लय लिँदै गरेको यस क्षेत्रमा केही हप्ता अघिसम्म दैनिक दुई सयभन्दा बढी पर्यटक आउने  गरे पनि पछिल्लो समय पर्यटकको सङ्ख्या ह्वात्तै घटेको हो ।

केही समय अघिसम्म पर्यटकको चहलपहल हुँदा दैनिक रु ३०र४० हजारभन्दा बढी आम्दानी हुने गरे पनि यति बेला पर्यटक नआउँदा दुई चार पैसा देख्न पनि मुस्किल हुने व्यवसायीहरू बताउँछन् ।  मुख्य आम्दानीको स्रोत भनेकै पर्यटक भएको कारण  पर्यटक आए आम्दानी, नआए समस्या हुने गरेको उनीहरूको गुनासो छ ।  बर्खा लागेसँगै पदमार्गमा आउने पर्यटकलाई समस्या हुने कारणले पर्यटक दुई तीन महिनासम्म नआउँदा व्यवसाय पनि नचल्ने भएकाले  निराश हुन परेको बताउँछन् ।

विदेशी पर्यटक हिमाल र पहाडका दृश्य, उच्च पहाड, मनाङवासीको रीतिरिवाज, प्राकृतिक सुन्दरता हेर्न र मनाङबाट थोराङ भञ्ज्याङ उक्लेर मुस्ताङ हुँदै पोखरा जान अन्नपूर्ण पदमार्गमा आउँछन् । मनाङका विभिन्न हिमाल तथा चुली चढ्न तथा हेर्न पर्यटक भित्रिन्छन्। अन्नपूर्ण पदमार्गको प्रवेशद्वार लमजुङ बेँसी हर नगरपालिका–७ मनाङको चौतारा हो। यस पदमार्गमा लमजुङ, मनाङ, कास्की, मुस्ताङ र म्याग्दी गरी पाँच वटा जिल्ला जोडिएको छ ।