साम्राज्ञीविरुद्धको मुद्दामा भुवन केसीको हार

काठमाडौं । अभिनेत्री साम्राज्ञी राज्यलक्ष्मी शाहविरुद्धको मुद्दामा अभिनेता तथा विकास बोर्डका अध्यक्ष भुवन केसीले हारेका छन् । अभिनेता केसीले २०७७ साउन ९ गते बेइज्जती सम्बन्धी दायर गरेको मुद्दामा साम्राज्ञी राज्यलक्ष्मी शाहले जितेकी हुन् ।  न्यायाधीश वासुदेव पौडेलको एकल इजलासले जाहेरीकर्ता केसीको दाबी नपुग्ने फैसला गरेसँगै   शाहले सफाइ पाएकी छन् ।

अभिनेत्री शाहविरुद्ध अभिनेता भुवन केसीले २०७७ साउन ९ गते जिल्ला अदालत काठमाडौंमा साम्राज्ञी आरएल शाहविरुद्ध १० करोड क्षतिपूर्तिको माग गर्दै गाली बेइज्जती मुद्दा दायर गरेका थिए । त्यतिबेला चलेको विवादमा साम्राज्ञीले आफूमाथि भुवनले शोषण र दुर्व्यवहार गरेको आरोप लगाएकी थिइन् । भुवनले पनि साम्राज्ञीलाई ‘जुन थालमा खायो, त्यही थालमा दुलो पारेको’ भन्दै आक्रोशित प्रतिक्रिया दिएका थिए । बलिउडका दिवंगत अभिनेता सुशान्तसिंह राजपुतको निधनको पृष्ठभूमिमा चलेको नेपोटिज्मको बहसमा साम्राज्ञी र भुवनको यस्तो विवाद चर्किएको थियो ।

अभिनेत्री शाहले मुद्दा जितेपछि आफूले लामो युद्ध जितेको भन्दै वकिल, सपोर्टर तथा शुभचिन्तकलाई धन्यवाद भनेकी छन् । उनले सामाजिक सञ्जालहरु मार्फत सम्पुर्णलाई धन्यवाद सहित जानकारी पनि गराएकी छन् ।