फिल्म ‘हात्तीछाप’को डिजिटल राइट्स महँगो रकममा बिक्री

काठमाडौं । छायांकन भइरहेको फिल्म ‘हात्तीछाप’को डिजिटल राइट्स ओएसआर डिजिटलले खरिद गरेको छ । निर्माता किरण नेपालीका अनुसार, फिल्मको नेपाली र हिन्दी भाषाको डिजिटल राइट्स ओएसआर डिजिटलले महँगो रकममा खरिद गरेको छ । सोमबार निर्माता नेपाली र ओएसआरका प्रमुख ओम अग्रवालबीच कागजी संझौता भएको छ ।

यो फिल्मको छायांकन सुरु भएको एक साता बढी भयो । सिमोस सुनुवारको निर्देशनमा तयार भइरहेको फिल्ममा दयाहाङ राई, सौगात मल्ल, उपासना सिंह ठकुरी, बेनिशा हमाल, वुद्दि तामाङ, विजय बराल, विल्सन विक्रम राई, राजन खतिवडा, रवीन्द्र झा, कमलमणी नेपाल, पुष्कर गुरुङ, प्रकाश घिमिरे, विनोद न्यौपाने, कविता आले, सुष्मा निरौला लगायतका कलाकारको अभिनय छ ।

यो फिल्ममा सुसन प्रजापतिको छायांकन, प्रदीप भारद्वाजको कथा लेखन रहेको छ । फिल्मको प्रदर्शन मिति तय भइसकेको छैन । तर, फिल्मको विदेशका विभिन्न देशको प्रदर्शन अधिकार समेत निर्माता नेपालीले विक्री गरिसकेका छन् ।