‘सुन तस्करी प्रकरणको अनुसन्धान प्रक्रिया सहज बनाउन गृहमन्त्री र अर्थमन्त्रीले राजीनामा दिनुपर्छ’

काठमाडौं । नेपाली कांग्रेसका सांसद सुनिल शर्माले नारायणकाजी श्रेष्ठ र अर्थमन्त्री डा. प्रकाशशरण महतको राजीनामा माग गरेका छन् । बुधबार बसेको प्रतिनिधिसभामा बैठकमा सांसद शर्माले त्रिभुवन विमानस्थल भन्सार कार्यालयबाट एक क्वीन्टल सुन बरामद भएको घटनामा भरियामात्र पक्राउ गरेको र मुख्य दोषी पक्राउ गर्न न सकेको भन्दै गृहमन्त्री र अर्थमन्त्रीको राजीनामा माग गरेका हुन् ।

उनले भने, ‘दुई छाक भात खान नपाएर सडकमा हिँडेका नेपालीहरूले हेरिरहेको विषय हो । काठमाडौं विमानस्थलबाट क्विन्टलका क्विन्टल सुन आउँदा पनि पक्डन नसक्नु भनेको हामी सबै त्यो दोषको भारिदार हुन्छौं । यो चिजलाई गुमचुम पारेर त्यो गाउँको बिचरा भरियालाई मात्रै होइन, मुख्य दोषीलाई पक्डियौं भन्नुपर्थ्यो । समय लिने हो भने ३ दिन ५ दिनभित्र समात्छु भन्न सक्नुपर्थ्यो । होइन भने अनुसन्धान प्रक्रिया सहज बनाउन सुनको मालिक पत्ता नलागेसम्म उहाँहरुले राजीनामा दिनुपर्छ ।’

सांसद शर्माले सुन प्रकरणमा संलग्न मुख्य अभियुक्तलाई पक्राउ नगरे आफू संसद्‌मै आमरण अनशन बस्ने चेतावनी समेत दिएका छन् ।