‘नियमको दुरुपयोग गर्ने राजनीतिक चलखेल स्वीकार्य छैन’

काठमाडौं । नेपाली कांग्रेसका नेता डा. शेखर कोइरालाले नेपाली सेनामा राजनीतिक चलखेल नगर्ने चेतवानी दिएका छन् । आइतबार सामाजिक सञ्जालमा लेख्दै नेता कोइराला राष्ट्रिय सुरक्षासँग जोडिएको र सधैं राजनीतिवाट अलग रहेको संस्थामा राजनीतिक चलखेल स्वीकार्य नहुने बताएका हुन् ।

सहायक रथी यमबहादुर अधिकारीको पदावधि थप्ने निर्णयप्रति शङ्का व्यक्त गर्दै नेता कोइरालाले लेखेका छन्, ‘नेपाली सेनाजस्तो राष्ट्रिय सुरक्षासँग जोडिएको र सधैं राजनीतिवाट अलग रहेको संस्थामा माओवादीको पुर्व लडाकुका लागि नियमको दुरुपयोग गर्ने चलखेल स्वीकार्य छैन । सेनामा गरिने राजनीतिक चलखेलले दुर्घटना निम्त्याउने हुँदा यस्तो कार्य नगरौं । सम्बन्धित निकायहरुलाई यो कुराको हेक्का होस ।’

सेनामा हुने चलखेलले दुर्घटना निम्त्याउने उनको भनाई थियो । यति बेला यमबहादुर अधिकारीको पदावधि थप्ने सरकारको निर्णय विवादित बनेको छ । माओवादी सेनाबाट समायोजन भएर गएकामध्ये सबैभन्दा उच्च पदमा पुगेका सहायक रथी अधिकारीको चार वर्षे पदावधि सकिएपछि सरकारले तीन वर्ष थप्ने निर्णय गरेको थियो ।