मुगुमा जुवाखालबाट १९ जना पक्राउ, ७० हजार रुपैयाँ जफत

काठमाडौं । मुगुको छायाँनाथ रारा नगरपालिकाभित्रका विभिन्न ठाउँबाट १९ जना जुवाडे पक्राउ परेका छन् । जिल्ला प्रहरी कार्यालय मुगुले शनिबार असोज २७ गते छायाँनाथ रारा नगरपालिकाको गमगढीबाट उनिहरुलाई पक्राउ गरेको हो ।

जिल्ला प्रहरी कार्यालय मुगुका डिएसपी बिरेन्द्र थापाले जुवा खेलबाट १९ जनालाई पक्राउ गरेको जानकारी दिए । मुगुको गमगढीमा रहेको ग्रान्ड होटल र टप टाउन होटल गरेर फरक–फरक ठाउँबाट १९ जना जुवाडेलाई पक्राउ गरेको छ । साथै प्रहरीले दुईवटाको समूहको साथबाट ५७ हजार ७० रुपैयाँ र १३ हजार ६ सय ५० रुपैयाँ गरि जम्मा ७० हजार ७ सय २० रुपैयाँ नगद समेत जफत गरेको छ ।

प्रहरीले शनिबार साँझ ५ बजेदेखि ६ बजेको सयममा उनिहरुलाई पक्राउ गरेको जनाएको छ । स्रोतका अनुसार जुवाखालबाट पक्राउ पर्नेमा १९ जनाभित्र छायानाथ रारा नगरपालिका–१४ का वडा अध्यक्ष जुनबहादुर खड्का पनि रहेका छन् । उनि केही दिन अगाडी छायानाथ रारा नगरपालिकाको कार्यबहाक नगरप्रमुख समेत बनेका थिए ।